Милли чIаларал гьазурзавай газетар, журналар кхьизвайбурун кьадар йисалай-суз тIимил жезватIани, редакцийрин коллективри пешекарвилин везифаяр кьилиз акъудзава, кIелдайбурув изданияр агакьарзава.
“Самур” журналдин 4-нумра жавабдар редактор Абдуселим Исмаилован “Табни яракь я” веревирдерилай гатIунзава. Ада исятда РагъакIидай пата ва США-ди Россиядиз малумарнавай къадагъайрин дяведиз, Украинадин миллетбазрин, фашистрин гьерекатриз вичин къиметар гузва.
“Шиират” паюна Зульфикъар Къафланован 65 йис тамам хьунихъ галаз алакъалу яз адан цIийи эсерар чапнава.
ХХ асирдин 30-йисара шаир хьиз майдандиз экъечIай Балакъардаш Султанован 110 йис къейд авунихъ галаз алакъалу яз адан “Батрак Агьмедан кьиникь” поэмадай чIукар ганва.
Нумрада гьикаятдин эсерар гзаф я. Нариман Ибрагьимован “Тапаррин къармахра” роман (сифте кьил 2021-йисан 4-нумрада) гун давамарзава.
Абдуселим Исмаилован, Абдул Фетягьан, Якьуб Яралиеван, Бикеханум Алибеговадин, Шамсудин Исаеван гьикаяяр, мезелияр гьевесдивди кIелиз жеда.
“Критика ва библиография” разделда Н.Ибрагьимован “Хъендик кумукьай шаир” (Хуьруьг Лукьманан 100 йисахъ галаз алакъалу яз) макъала ганва.
* * *
“Дагъустандин дишегьли” журналдин 4-нумрани чапдай акъатнава. Ана кIелдайбурун фикир желбдай итижлу ва жуьреба-жуьре макъалаяр, зарисовкаяр, новеллаяр, дишегьлийриз яшайишда герек къведай теклифар, меслятар, мисалар ава.
Дагъустандин халкьдин артист, машгьур манидар Суьлгьия Гьажиева гзафбуруз чида ва чи агьалияр адан сесинал, манийрал кьаруни я. Идакай журналди 30 йис идалай вилик кхьенай. Къе журналист Суьлгьият Булгаевади вичин макъалада тIвар-ван авай манидардин уьмуьрдин, яратмишунрин цIийи терефар ачухарзава. РикIе илгьамдин нур куькIвенвай дишегьлидин, дидедин, бадедин уьмуьр жанлуди, вакъиайрив ацIанвайди я эхир.
Са рахунни алач, кIелдайбуру Дагъустандин халкьдин шаир Майрудин Бабаханован шиирризни итиж ийида. ГьикI лагьайтIа, дидедиз, дишегьлийриз, кIанибуруз бахшнавай эсерра михьи кIанивилин, вафалувилин, мегьрибанвилин гьиссер пара ава. “КIанибурун кефи хамир Жезмай кьван са чIавузни. Йифиз, вацра шагьидвалдай, Я рагъ куькIвей юкъузни”, — кхьизва шаирди.
Къенин аялриз, жаванриз чи бубайрин, дидейрин алатай уьмуьрдин яшайишдиз талукь гзаф крар чизвач. Журналди милли яшайишдин тарихдиз вил вегьин вичин хивез къачунва. Алатай нумрайра Наира Шихнабиевади дингиникай (нехв ва прунз гатадай алат), сеняткарвилин кьит пешейрикай чирвал гана. Гила лезгийрин аламатдин тIямлу фар чразвай тIанурдикай ихтилатзава.
Абад Азадов
