3-сентябрдиз, терроризмдиз акси женгина рейсадвилин юкъуз, Дербент районда Бесландин мусибат рикIел хкана. Райондин культурадин, жегьилрин сиясатдин ва туризмдин управлениди тешкилнавай “Беслан. Чи тIал…” мярекатда школайра кIелзавай аялри, муаллимри, администрациядин къуллугъчийри иштиракна.
И югъ террористри Бесландин мектебда хьайи мусибат, ана телеф хьайи пуд виш кас, хирер хьайи залукар, чпин уьмуьр террористрихъ галаз женгина къурбанд авур ФСБ-дин, къанун-къайда хуьдай органрин векилар рикIел хкунин югъ я”, — лагьана райондин кьилин заместитель Икрам Бебетова.
Жегьилрин сиясатдин отделди “Мусибат тикрар хьун лазим туш” лишандик кваз рикIел хуьнин тарс тухвана. КIватI хьанвайбуруз терроризмдикай, адаз гьикI акси акъваздатIа, терактдин хаталувал авай шартIара жув тухунин асул къайдайрикай суьгьбетна.
Ахпа 2004-йисан 3-сентябрдиз Бесланда хьайи мусибатдикай видеоролик къалурна. Эхирдай аялри шиирар кIелна, ватанпересвилин манияр лагьана. Мярекат са декьикьада кисна акъвазуналди акьалтIна.
Къагьриман Ибрагьимов
