2-сентябрдиз РД-дин Кьил Сергей Меликова Ахцегьа авай, федеральный дережадин медениятдин ирсинин объектрик акатзавай къеле хуьнин месэладай совещание кьиле тухвана.
Веревирдер ийидалди вилик Сергей Меликова къеле гуьнгуьна хтунин чарасузвилин месэла къарагъарай РД-дин Халкьдин Собранидин депутат Имам Яралиеваз сагърай лагьана.
Республикадин регьберди малумарайвал, туриствилин жигъиррив медениятдин объектрин тарихдин ивирар терг ийиз туна виже къведач. Адан гафаралди, ихьтин объектар туриствилин килигуниз лайих чкаяр хьиз кардик хьайитIани жеда, амма абурун къиметлувал гележегдин несилар патал хуьн герек я.
“Ахцегьрин къеле, Хуьруьгрин жуьмя мискIиндин минара ва медениятдин ирсинин ихьтин маса имаратар сифте нубатда илимдин кIвалах патал бине хьана кIанда”, — къейдна С.Меликова.
Дагъустандин медениятдин ирс хуьнин Агентстводин регьбер М.Мусаева имарат хуьнин къайдайрикай, ам алай аямдин шартIара ишлемишиз хьунин мумкинвилерикай ихтилатна. Адан гафаралди, медениятдин ирсинин объект хуьнин лап хъсан шартI ам датIана кардик хьун я.
Къеле хуьн патал ам цIийи хъийидай гьакъисагъ инвестор желбун, кьетIен гуьзчивилик кутун герек тирди къейдна.
«Лезги газет»
