Сефил хьайи

Дагъларай куьч хьана хуьрер арандиз,

Аманат яз, гьар са кIама багъ туна.

Гила анаг чуплах хьана явандиз,

Аквадач ваз багълар садни сагъ туна.

 

Сад Аллагьди, чи нефсинихъ инсафни

Галаз, вири яратмишна чилел чи.

Чи бубайрин тербиядин са гафни,

Акьуллу тир аламачни рикIел чи?

 

Чун камаллу яз, тIебиат гуьзелдиз

Хьайила, чал гьейран жеда гъейрибур.

Багъ — бустан, нямет гузвайди чи элдиз,

Тийижирбур акьулдиз я кьерибур.

 

Гьайванарни чи алемда, къушарни

Гьашаратар малум тушир гзаф я.

Диде — тIебиат женнетдиз ухшарди

Хьун патал чахъ кIанзавайди инсаф я.

 

Инсанри, гъурбат хьиз хьана, чилел чи

Яргъалди сагъ тежедай хер ийизва.

Багъ битмишай фяледин кьве гъилел чи

Ягъанатдив текъведай хъвер ийизва.

 

Зегьем авайла, чаз кIанда серинар,

Билбил рахаз, къацу хьана тарарни.

Мекьи хъуьтIуьз, тар атIана, руькуьнар,

ЦIай жен къула, ахъай тийиз ракIарни.

 

Чаз каш гайи дявед четин йисаркай

Мад такурай, тикрарункай дад авач.

Гьарайдиз гьай гайи хатрут тараркай

Женнет бубад багъда дарман сад амач.

 

Хабар авач

Валлагь, гуьзел, ви дердеркай

Заз зеррени хабар авач.

На ви рикIин сирерикай

Гьич заз кхьей са чар авач.

 

Мез ширин я, рикI аквадач,

Ви хунчадик вуч кватIа, яр.

Багъ жегьил я, цуьк аквадач,

Бегьердикай гьикI хьуй хабар?

 

РикIин сир ваз гузвайди

Зи ширин тир мез я, гуьзел.

Ваз чида рикI вахъ кузвайди,

РикI акун ви квез я, гуьзел?

 

Ажеб хьана вун къуншидал,

Заз ви мили хъвер  багъишиз.

Гьар зун фир чIавуз дердидал,

Ваз яру цуьквер багъишиз.

 

Килиг, вун тахьуй ягъалмиш,

Чал масада хъвер тавурай.

Течир, яд касдал расалмиш

Хьана, гьадал звер тавурай.

 

Гуьруьшдин югъ хуьх на рикIел,

Гьейран яз, энгел тахьурай.

Сиягьатдин багъри рекьел,

Гел квахьна, эчIел тахьурай.

Тажудин Женнетов, «Лезги газетдин» 2018-йисан 20-нумра