Уьлкведин Яракьлу Къуватри Донбасс хуьнин, Украина миллетбазрикайни фашистрикай азад авунин мураддалди кьиле тухузвай женгинин махсус серенжемда РФ-дин гзаф халкьарин векилрихъ галаз санал лезги рухвайрини викIегьдиз иштиракзава. Немсерин фашистрихъ галаз женг чIугур чи баркаллу бубайрин крар лайихлудаказ давамарзавай абуру къе, чпин ватанпересвилин буржи тамамардайлани, кьегьалвилинни жуьрэтлувилин чешнеяр къалурзава.
Абурун жергеда вичин ери-бине Ахцегь райондин Ухулрин хуьряй тир гвардиядин старший сержант Къазиагьмедов Артурни ава. И мукьвара адан диде-бубадин тIварцIел частунин танкарин батальондин командирдин заместителдилай чухсагъулдин чар хтана. “Евпаториядин мотострелковый дивизиядин гвардиядин батальондин танкарин 2-взводдин танкунин командир, старший сержант Артур Къазиагьмедова сифте йикъалай вич тербиялу, кар алакьдай дирибаш аскер яз къалурна. Тапшурмишай гьар са кар, энгел тавуна, дуьздаказ тамамарун, юлдашриз куьмекун викIегь дагъвидиз хас лишанрикай я. Дяведин вердишвилер къачунин серенжемра кьетIен дирибашвал ва вини дережадин пешекарвал къалурунай ам командованидин патай са шумудра чухсагъулдин чарариз лайихлу хьанва”,- къейднава чарче.
Алай вахтунда Артура къуллугъзавай частуни Украинада кьиле физвай къизгъин вакъиайра иштиракзава. Душмандихъ галаз женгина нубатдин кьегьалвал къалурунай ам Россиядин Президент Владимир Путинан 2022-йисан 21-июлдин Указдалди Жукован медалдиз лайихлу хьанва. Адахъ чандин сагъвал, Ватан хуьнин рекье мадни еке агалкьунар хьурай ва ам гъалибвал къазанмишна, сагъ-саламатдиз кIвализ хтурай!
Дашдемир Шерифалиев
