26-августдиз СтIал Сулейманан районда образованидин работникрин августдин совещание хьана. Ана райондин кьил Саид Темирханова, Дагъустан Республикадин образованидин ва илимдин министерстводин пешекарвилин образование вилик тухунин отделдин меслятчи Нюрьян Вагаевади, образованидин управленидин начальник Гьуьсейн Шихбабаева, образованидин идарайрин руководителри, педагогвилин зегьметдин ветеранри, диде-бубайрин комитетрин ва СМИ-рин векилри иштиракна. Саид Темирханова педагогвилин хилен пешекарар тебрикна, абуруз Чирвилерин югъ ва цIийи кIелунин йис мубаракна.
Райондин кьил образованидин хилен пешекаррихъ ва идарайрихъ хьанвай хъсан нетижайрал, агалкьунрал гегьеншдиз акъвазна, гьакI ам вилик кумай везифайрикайни рахана, кIвалах хъсанардай рекьер къалурна.
Гь.Шихбабаева вичин докладда къейд авурвал, образованидин организацийрин дараматрикай анжах 10 типовояр я, 21 аварийный реестрда ава. 15 школа капитальнидаказ ремонтна кIанзава.
Эхиримжи йисара образованидин организацийрин материально-технический база мягькемарун патал кIвалахар давамарзава. 4 школа патал цIийи дараматар эцигна, ишлемишиз вахкана. ЦIи “Хуьрерин мулкар комплекснидаказ вилик тухун” госпрограммадай эцигнавай Агъа СтIал-Къазмайрин школадин цIийи дарамат, республикадин инвестицийрин программадай эцигнавай ДаркIуш-Къазмайрин аялрин бахчадин дарамат ишлемишиз вахкун гуьзлемишзава. Идалайни гъейри, Герейханован 2-нумрадин школадин цIийи дарамат эцигунин кIвалахар кьиле тухузва. Мад са шумуд эцигун пландик ква.
“Образование еримлу авун” госпрограммадин “Школайрин образованидин къурулушар цIийи хъувун” проектдай 4 школа капитальнидаказ ремонтна.
Гь.Шихбабаева алава хъувурвал, школаяр учебникралди таъмин хьуни 72 процент тешкилзава. Бес тежезвай учебникрин патахъай республикадин образованидин ва илимдин министерстводиз арза ганва.
КIелунинни тербиядин кIвалахда диде-бубайрин комитетрин везифайрикай адан председатель Эльза Рустамова рахана.
Эхирдай райондин кьил Саид Темирханова намуслу зегьметдай, кIвалахда агалкьунрай са жерге педагогрив Гьуьрметдин грамотаяр, райондин кьилин тIвар кхьенвай сятер, чухсагъулдин чарар, гьакIни РД-дин образованидин ва илимдин министерстводин шабагьар вахкана.
Хазран Кьасумов
