Лезги халкьдин арадай машгьур спортсменар, къуватлу пагьливанар вилик девиррани акъатна, абур гилани ава. Мадни шадвал кутадай кар ам я хьи, вилик йисарин тIвар-ван авай, чIехи дережайриз хкаж хьайи спортсменрилай чешне къачуна, алай вахтунда гзаф жегьилри спортдин жуьреба-жуьре рекьерай чпин устадвал хкажзава, чемпионатрани турнирра агалкьунар къазанмишзава. Абурукай сад Санкт-Петербургда яшамиш жезвай жегьил дзюдоист Амир Алибегов я. Адакай делилар заз Санкт-Петербургдай рухсатриз вичин хайиди тир ДаркIуш-Къазмайрал хтанвай адан дах Илгара ва чIехи буба Бакира гана.
Амира эхиримжи йисара зирек лезги гадади машгьур тренерар тир Олег Ерёминан ва Марина Клименкодин гъилик вичин устадвал хкажзава, турниррани хъсан нетижаяр къалурзава. Амир Алибеговахъ 20-далай виниз медалар, дипломар ва маса шабагьар ава.
2022-йисан майдин вацра Амира Сосновый Бор шегьерда 18 йисал къведалди яшда авай спортсменрин арада кьиле фейи Ленинграддин областдин спартакиадада иштиракна ва вичин заланвилин дережадай 2-чка кьуна.
Алай йисан июлдин вацра Архангельск шегьерда 18 йисал къведалди яшда авай спортсменрин арада Северо-Западный федеральный округдин кIвенкIвечивал патал акъажунар кьиле фена. Ана Амир Алибегова 2-чка кьуна, РФ-дин спортдин мастервиле кандидатвилин дережа къачуна.
Северо-Западный федеральный округдин хкянавай командадик кваз мукьвал йикъара А.Алибегова Саранск шегьерда Россиядин кIвенкIвечивал патал кьиле фидай акъажунра иштиракда. Чаз адахъ мадни еке агалкьунар хьана кIанзава.
Хазран Кьасумов
