22-майдиз РД-дин тIебиатдин ресурсрин ва экологиядин министерствода “Самурдин” милли парк арадал гъунин рекьяй ведомствойрин уртах рабочий дестедин членрин гуьруьш кьиле фена. Идан гьакъиндай “Лезги газетдиз” министерстводин пресс-къуллугъди хабар гана.
Совещанида РД-дин тIебиатдин ресурсрин ва экологиядин министр Набиюла Карачаева, “Экология ВНИИ” ФГБУ-дин директор Сергей Фокина, Россиядин WWF проектрин старший координатор Роман Мнацеканова ва и кардиз итиж ийизвай министерствойрин, ведомствойрин ва муниципалитетрин векилри иштиракна.
Ведомствойрин уртах дестедин тIварунихъ тебрикдин гафар ва абуру бегьерлудаказ кIвалахна кIанзавайдакай лагьайдалай гуьгъуьниз “Самурдин” милли парк арадал гъунин гьакъиндай проектрин къараррикай Роман Мнацеканова лагьана. Къараррин копияр и кардиз итиж ийизвай вири къурулушриз абурун фикир чирун ва алаваяр кухтун патал рекье туна.
Къейд ийин хьи, милли парк сад садавай чара тир кьве участокдикай ибарат жеда: “Самурдин дельта” кластер, ам Прикаспийский дуьзенлухда ава (13 агъзур гадилай гзаф) ва Кьиблепатан Дагъустандин кьакьан дагълара авай “Шалбуздагъ” кластердикай (42 агъзур гадилай гзаф).
И мукьвара милли парк арадал гъидай районрин мулкарал и месэладай общественный веревирдер кьиле фида. Гьа са вахтунда гьакIни гележегдин объектдин мулкунин сергьятар тайинарунин, “Самурдин” милли паркуник акатзавай мулкарин сагьибрин ва чилин участокар ишлемишзавайбурун гьакъиндай малуматар фикирдиз къачун патал кIвалахарни кьиле тухуда.
“Чун элкъуьрна кьунвай тIебиат хуьнин ВНИИ” ФГБУ-дин директор Сергей Фокина къейд авурвал, милли парк арадал гъуникай жуьреба-жуьре гьайванар ва набататар хуьнин рекьяй неинки Дагъустандин ва Россиядин тIебиатдиз хийир жеда, гьа са вахтунда и карди республикада экологиядин туризм вилик тухун уьмуьрдиз куьчуьрмишунизни куьмекда. Ида региондин бюджетдиз алава къазанжияр гъида ва кIвалахдай алава чкаярни жеда.
Чи мухбир
