18-майдиз Каспийскда, Республикадин образованидин центрада, мергьяматлувилин фестивалдин сергьятра аваз литературадин международный “Къуй хъсан гафуни руьгь ахварай авудрай”, шикилрин “Зи къени Дагъустан” ва яратмишунрин “Виридалайни гуьгьуьллуди” конкурсрин гъалибчийрив шад гьалара премияр вахкана. Мярекатдин важиблувал адакай ибарат тир хьи, литературадин конкурсда чпихъ яратмишдай бажарагъ авай, къецепатан 5 уьлкведай, Россиядин 38 субъектдай, Дагъустандин вири районрайни шегьеррай атанвай 9-20 йисарин яшарин аялрини иштиракна. Абурун кьадар 580-далай алатнавай.
Фестиваль Ильман Алипулатован (гъвечIидан) тIварунихъ галай мергьяматлувилин “Аялриз пакадин югъ багъишин” фондунин, РД-дин образованидинни илимдин ва РД-дин педагогрин Ассоциациядин куьмекдалди тешкилнавай. Аялрив абуру гьакьван вилив хуьзвай премияр вахкуз, иниз РД-дин Гьукуматдин Председателдин заместитель- образованидинни илимдин министр Уммупазиль Омарова, РД-дин печатдинни информациядин министрдин везифаяр вахтуналди тамамарзавай Рашид Акавов, Ильман Алипулатован (гъвечIидан) тIварунихъ галай мергьяматлувилин фондунин президент, машгьур журналист Ильман Алипулатов ва масабур атанвай. Абур Республикадин образованидин центрадин регьбер Анжела Байрамбеговади кьабулна.
Финалдиз акъатай аялар тебрикдайла, Уммупазиль Омаровади кьиле тухванвай конкурсрин важиблувал къейдна: “Эбеди ва руьгьдин ивиррин къиметлувал гьиссун патал чаз ихьтин мярекатар герек я. Чна чи бажарагълу аялрал — гележегдал дамахна кIанда. Абуру неинки конкурсра иштиракзава, кIвенкIвечи чкаяр кьазва, гьакIни чешнелу краралди чи республика машгьурзава. Мукьвара чна инсанар кьиникьикай къутармишнавай аялрив премияр вахкана. Республикада авай волонтеррин дестейри гьихьтин жавабдар ва важиблу кIвалах кьиле тухузва! И кар Европадин чемпионатдилай кьулухъ Дагъустандин Кьилини къейдна. Акьалтзавай несилри дагъустанвийрин асирралди давам жезвай адетар, дуствал, гьуьрмет хуьн кар алай месэла я”, — лагьана вице-премьерди.
Ильман Алипулатова вичин рахунра мярекатдин кьилин макьсад инсанар мергьяматлувилин ва гуьгьуьллувилин серенжемрал желб авуникай, бажарагълу жегьил къуватриз куьмек гуникай ибарат тирди къейдна.
Анжела Байрамбеговадин гафарай малум хьайивал, винидихъ къейднавай мергьяматлувилин фондуни пуд йисан къене аялрин яратмишунрикай ибарат тир пуд ктаб чапдай акъуднава. Анра виридалайни хъсан, сечме эсерар гьатнава. Сад лагьай ктаб, начагъвал себеб яз, аялзамаз рагьметдиз фейи, къе вичин тIварцIихъ мергьяматлувилин чIехи фонд арадал гъанвай Ильман Алипулатован экуь къаматдиз бахшнавай…
“Конкурсар кьиле тухуналди чаз чи аялрин, гележегдин ван хьана кIанзавай. Чаз абурун ван атана. Вири гъалибчияр я, гьикI лагьайтIа, куьне дидед чIал хуьзва, адалди яратмишзава. Квехъ мадни еке агалкьунар хьурай!”, — лагьана А.Байрамбеговади, аялрихъ элкъвена.
Литературадин международный конкурсдин лауреатар чпи ингилис, урус ва Дагъустандин халкьарин чIаларал кхьизвай 84 аялдикай хьана. Абурув ва муькуь конкурсдин гъалибчийривни кубокарни дипломар вахкана.
Агьмед Магьмудов
