И мукьвара Дагъустан Республикадин Гьукуматдин Председателдин заместитель Нариман Абдулмуталибов СтIал Сулейманан райондиз кIвалахдин рекьяй мугьман хьана. Райондин кьил Саид Темирханов ва администрациядин жавабдар пешекарарни галаз ам “Образование виликди тухун” госпрограммадин “Мектебрин образованидин къурулушар алай аямдив кьадайвал туькIуьрун” проектдин сергьятра аваз районда капитальнидаказ ремонт хъийизвай 4 школадиз ва “Хуьрерин чкаяр вири патарихъай еримлу авун” госпрограммадай эцигна саки акьалтIарнавай, алай вахтунда дуьзмишунин кIвалахар тухун давамарзавай Агъа СтIал-Къазмайрин цIийи школадин объектдал фена, анра ремонтрин ва эцигунрин кIвалахар кьиле тухузвай гьалдихъ галаз таниш хьана.
Агъа СтIал-Къазмайрал эцигзавай цIийи школадин заказчик “Дагсельхозстрой” ГКУ, пудратдин карханани “Дагсвязьинвест-1” ООО я. Школада 460 аялдиз чкаяр жеда.
Капитальный ремонтрин кIва-лахрикай рахайтIа, Кьасумхуьруьн 1-нумрадин юкьван школада (1 ва 2-мертебаяр), Кьулан СтIалрин юкьван школада тарсар гузвай корпус, ЦIийи Макьарин юкьван школада 2 корпус, ЦIийи поселокдин юкьван школада 1 корпус ремонт хъийида.
Н.Абдулмуталибова лагьайвал, образованидин объектар эцигун ва капитальнидаказ ремонт хъувун РД-дин Кьил Сергей Меликован ва Гьукуматдин Председатель Абдулмуслим Абдулмуслимован кьетIен гуьзчивилик ква. Ам нубатдин сеферда райондиз атунни гьам эцигунрин, гьамни ремонтрин кIвалах-рал гуьзчивал артухарунихъ, кIвалахрин еришар йигинарунихъ, амай кимивилер арадай акъудунихъ галаз алакъалу я. И рекьерай Нариман Абдулмуталибова райадминистрациядин ва пудратдин организацийрин пешекарриз тапшуругъар гана, абур кьилиз акъудун вичин гуьзчивилик кутунвайди къейдна.
Хазран Кьасумов
