Алай йисан 20-августдин йифиз “Кочубей — Минеральные воды” шегьреда  пар тухудай чIехи машин инсанар авай микроавтобусда акьуна. Нетижада  8 кас телеф, 13 касдал хирер хьана. 

РД-дин Гьукуматдин Председатель Аб­­дулмуслим Абдулмуслимова 21-август­диз республикадин травматологиядин центрада, республикадин клиникадин азарханада, аялрин клиникадин больницада къаткурнавай хасаратвал хьанвайбурал кьил чIу­гуна.

Азарханадиз аватнавайбурукай виридалайни гъвечIиди тир Саидан 28-августдиз 10 йис жеда. Аб­дулмуслим Абдулмус­ли­мо­ва хи­рер­ хьанвай гададиз  жезвай юби­лей муба­ракна ва гьа юкъуз вичив хъсан пиш­кеш­ни агакьдайдакай лагьана. Да­гъус­тан­дин духтурри аял сагъарунин карда Москвадин пешекарривайни меслятар къачузва.

РД-дин здравоохраненидин министр Татьяна Беляевади баянар гайивал,  азарханайриз аватнавайбурун гьал кIевиди ятIани, уьмуьр патал хаталувал авач. Тади гьалда сагъар хъувун патал азарханайрин духтурри абуруз  алакьзавай вири жуьредин куьмекар гузва.

Абдулмуслим Абдулмуслимова хабар гайивал, РД-дин Кьил Сергей Меликова  хаталу дуьшуьшдик акатай ва инсанар телеф хьайи хизанриз пулдин куьмек гунин къарар акъуднава.

«Лезги газет»