Дагъустанда VII сеферда яз кьиле фейи Россиядин “Кавказ” интернет-форумда РД-дин Гьукуматдин Председатель А.Абдулмуслимовани иштиракна. Идакай РД-дин Гьукуматдин пресс-къуллугъди хабар гана. Махачкъалада авай “Дурнаяр” НОК-дин майдандал тешкилай мярекат гатIундалди вилик премьер-министр IT-технологийрин выставкайриз килигна.
А.Абдулмуслимова уьлкведихъ авай хатасуз мумкинвилерин бинедаллаз рекъемрин месэлаяр еримлу авунихъ элкъуьрнавай форумдин кьилин тема метлеблуди тирди кьетIендаказ къейдна.
“Чара уьлквейрай мал гъунин ва анриз тухунин, гьакIни информациядин хатасузвилин, гьар йикъан уьмуьрдиз искусственный акьулдин элементар гъунин, пешекарар гьазурунин месэлаяр къенин юкъуз лап важиблубурукай я. Чаз чизва хьи, и хиле гьялиз тахьанвай месэлаяр ама. Форумдин кIвалахдин нетижада абур гьялдай рекьер жагъуруник чна умуд кутазва”, — лагьана ада.
Форум ачухунин мярекатдал тебрикдин гафар РФ-дин рекъемрин рекьяй вилик финин, алакъадин ва массовый коммуникацийрин министрдин заместитель Андрей Заренинни рахана.
22-23-августдиз давам хьайи форумдин сергьятра аваз иштиракчийри “Информациядин хатасузвал ва делилар хуьн. Чахъ авай мумкинвилер ишлемишна, месэлаяр гьялун ва государстводин патай куьмек” темадай пленарный заседанидал веревирдер авуна. И мярекат “Национальные системы управления” ассоциациядин председатель Ирина Зариповади ачухна.
Иштиракчийри дискуссиядин жуьредани кьилдин майданрал суьгьбетар, веревирдер авуна. Метлеблу ихтилатар авур иштиракчийрин арада РФ-дин рекъемрин рекьяй вилик финин, алакъадин ва массовый коммуникацийрин министерстводин киберхатасузвал таъминарунин департаментдин директордин заместитель Евгений Хасин, “Отечественный софт” разработчикрин ассоциациядин крар идара ийизвай директор Ренат Лашин, “РЕД СОФТ” тешкилатдин генеральный директордин заместитель Рустам Рустамов ва масабур авай.
«Лезги газет»
