23-августдиз “Дагестан” РИА-дин майдандал кьиле фейи конференциядал РД-дин хуьруьн майишатдин ва суьрсетдин министр Мухтарбий Аджекова ведомстводин кIвалахдикай суьгьбетна.
Министрди къейдна хьи, цIинин йисан сад лагьай паюна республикадин хуьруьн майишатдин хиле хъсан (96 процентдин) нетижаяр къазанмишна.
“Чкадин аграрийрихъ чпин продукция гьасилдай ва маса гудай, гьа идалди республикадин бюджет хкаждай мумкинвал хьана. Чкадал гьасилзавай продуктар уьлкведилай къецепатаз тухузва, а уьлквейра абурухъ гзаф муьштерияр ава”, — къейдна М.Аджекова.
Адан гафаралди, къенин юкъуз регионда прунзчивал, малдарвал, набататчивал активнидаказ вилик физва ва чкадин дуьгуьдихъ гзаф муьштерияр ава.
“Дагъустандин дуьгуь виридалайни хъсанди яз гьисабзава. Россиядин чIехи компанийри ам гзаф кьадарра маса къачузва. Гьа икI лапагдин якIукайни лугьуз жеда. Чна лапагдин як Ирандиз, Саудовский Аравиядиз ва РагъэкъечIдай патан уьлквейриз рекье твазва. Гьерен як Дагъустандин ярж (бренд) хьанва. Алай вахтунда хуьруьн майишатдин хиле республикадихъ еке агалкьунар хьанва. И карди чун шадарзава”,- лагьана министрди.
Кар алай месэлайрикай рахуналди, аграрный ведомстводин руководителди регионда майваяр хуьдай чкаяр бес тежезвайдакайни лагьана. Кьилди къачуртIа, министрди гьамишалугъ кардик квай мекераяр (ярмаркаяр) тахьуникайни лагьана.
Шагьисмаил Гьажимирзоев
