20-августдиз Махачкъалада, Иса пайгъамбардин (алейгьи салям) тIварунихъ галай руьгьдинни марифатдин центрада диндин чIехи межлис кьиле фена. Мярекат цIи машгьур меценат Сулейман Керимован куьмекдалди тешкилай гьаждин ва Мугьаммад пайгъамбардин (Аллагьдин патай салам ва салават хьуй вичиз) мискIин эцигна акьалтIарунин месэлайриз талукьарнавай. Къейд ийин хьи, мискIин эцигун Сулейман Керимова вичин хивез къачунва.
Межлисда РД-дин Муфтиятдин, мергьяматлу фондарин, жемиятдин, илимдин векилри, динэгьлийри иштиракна. Мярекат ачухдайла, Дагъустандин муфтийдин куьмекчи Мугьаммадрасул Саадуева цIи гьаждал фейи вири дагъустанвийрин патай Сулейман Керимоваз сагърай лагьана:
“Сад тир Аллагьди гьар са мусурмандин вилик жуьреба-жуьре ибадатар эцигнава. Абурукай сад гьаж я. И мярекат кьиле тухуналди чаз сифте нубатда цIи гьаж хъсан гьалара кьиле финай Аллагьдиз шукур гъиз ва вишералди дагъустанвийриз гьаждал финин карда куьмекар гунай Сулейман Керимоваз сагърай лугьуз кIанзава”, — къейдна М.Саадуева.
РикIел хкин, Сулейман Керимова Дагъустандай гьаждал физвай гьар са касдин паталай “Махачкъала-Медина” авиарейсдиз акъатзавай пулунин такьатар вичел къачуна. Мергьяматлу и кардиз баянар гудайла, Дагъустандин муфтий Агьмад гьажи Абдуллаева “гьаждал фейи гьар са дагъустанви патал и куьмек къимет авачирди я” лагьанай.
Къейд ийин хьи, С.Керимован пулунин такьатрихъ цIи гьаждал фейибурун кьадар 1 агъзурдав агакьна.
Агьмед Магьмудов
