Менфятлу сиясат тухуда

Государстводин пайдахдин йикъахъ галаз алакъалу яз авур рахунра РФ-дин Президент В.Путина малумарна хьи, Россияди­, къудратлу уьлкведи хьиз, дуьньядин майданра вичин гьакъикъи итижриз жаваб гудай сиясат кьиле тухуда. Президентдин фикир “Новости” РИА-ди раижна.

“Россия къудратлу, масадалай аслу тушиз кар алакьдай уьлкве я”, — лагьана Президентди. Ам инанмиш я хьи, Россиядин­ пайдах уьлкведин ватандашрин вири несилар патал гьамиша пак ярж яз амукьда. Пайдахди акьалтзавай несилрик ватанпересвилин гьиссер кутазва.

Шольца гайи гаф

Уьлкведин са жерге СМИ-ри малумарзавайвал, Германиядин­ канцлер О.Шольца Украина мукьвал тир 30 йисан муддатда НАТО-диз кьабулдач лагьана хиве кьунва. Къейдзавайвал, ихьтин гаф ада Россияди СВО кьиле тухунив эгечIдалди вилик гана.

Чешмейрин делилралди, вичин фикир ада и йисан февралдин юкьвара, Москвадиз атайла, малумарна. Идалайни гъейри, Германиядин гьукумдарди гуя НАТО-ди Москвадиз садрани къурхуяр гайиди туш лагьана.

ООН-ди эвер гузва

Россиядин журналист Дарья Дугина кьиникьихъ галаз ала­къа­лу вири делилар дуьздал акъудун патал ООН-ди силис тухуниз эвер гузва, лагьана ООН-дин генсекдин векил С.Дюжаррика. Адан гафар “Новости” РИА-ди раижна.

Политолог ва журналист Д.Дугина Москвадин патав автомобиль хъиткьинаруникди кьена. Ислендиз Россиядин ФСБ-ди ма­лумарайвал, Украинадин махсус къуллугърин буйругъдалди Д.Дугина кьинин кар  Н.Вовка кьилиз акъудна ва гуьгъуьнлай ам Псковдин областдай Эстониядиз хъфена. Силис тухунин материалар уьлкведин Силисдин комитетдив вуганва.

РФ-дин Президент Владимир Путина Д.Дугинадиз, чандилай­ни гъил къачуна, пешекарвилин буржи тамамарунай (кьейидалай кьулухъ) ВикIегьвилин орден гунин къарардал къул чIугунва.

КIеви серенжемар герек я

Федерациядин Советдин конституциядин комитетдин кьил А.Клишаса гьисабзавайвал, Эстониядизни, Литвадизни талукь яз кIеви серенжемар кьабулунин себебар ава. Идакай “Новости” РИА-ди хабар гана.

Ихьтин фикир А.Клишаса Эстониядин терефди Дарья Дугина кьейи кас далдаламишзавайвиляй малумарна.

Идалай вилик Федерациядин Советдин международный комитетдин кьилин сад лагьай заместитель В.Жабарова эгер Эстонияди журналистка Дарья Дугина кьиникьихъ галаз алакъалу яз шак физвай Наталья Вовк Россиядив вахкун тавуртIа, РФ-диз Таллиндиз акси яз кIеви серенжемар кьабулдай себебар авайдакай лагьанай.

А.Клишасавай Telegram-каналда “Россиядин сагъ са регион террордик кутунвай ва и кар давамарзавай Литвадиз акси яз кьетIи серенжемар кьабулдай себебар авачни?” — лагьана, суал гана са агьалиди. “Ава”, — жаваб гана Клишаса. Ихтилат Калининграддикай физва.

Акьулсуз кар

Франциядин дипломат Э.Берга къейднавайвал, россиявийриз акси яз визайрин сергьятвилер кардик кутуртIа, идакай Евро­союздиз вичиз зарар жеда. Адан гафар “ТАСС” чешмеди раижна.­

“Эгер чна часпарар кIевнайтIа, инсанриз РагъакIидай пата гьакъикъатда кьиле физвай крар аквадай мумкинвал жедачир. Им пара пис фикир, акьулсузвал я”, — лагьана Берга.

Адан фикирдалди, визайрин жигьетдай къадагъаяр кардик кутунин къарар кьабул тавуна амукьда.

Идалай вилик ЕС-дин къецепатан сиясатдин къуллугъдин кьил Ж.Боррела россиявияр патал визаяр тамамдиз къадагъа авунин тереф вичи хуьзвачирди лагьанай.

Д.Медведеван зенд

РФ-дин Хатасузвилин Советдин Председателдин заместитель Дмитрий Медведева къейд авурвал, Киевди чеб патал геле­жегдин са гьихьтин ятIани “хатасузвилин заминвилер” арадал гъун давамарзава. Амма, малум хьанвайвал, Киевдиз къуншийривай хатасузвилин заминвал гуз жедач. Ихьтин фикир Д.Медведева вичин Telegram-каналда кхьена.

“Киевдин режимдиз чизва хьи, исятда Украинадин кьиле авайбур патал гьич са жуьрединни хатасузвилин заминвилер авач ва жедач”, — къейдна ада. Алава хъувурвал, США-ди анжах чпикай фикирзава, чеб патал кIвалахзава.

Ковид

Садакай масадак акатдай азаррихъ галаз женг тухузвай оперштабдин сайтди 23-августдиз раижай делилралди, эхиримжи юкъуз Россияда коронавирус акатайбурун кьадар 30 967-дав агакьна. 30 869 кас сагъ хъхьана, 69 — кьена. Са йикъан идалай вилик уьлкведа ковид акатай 33 061 кас дуьздал акъуднай.

ТIугъвал пайда хьайидалай инихъ начагъ хьайибурун кьадар, эхиримжи делилралди, 19 181 371-дав агакьна.

«Лезги газет»