Мукьвара Ахцегь райондин Луткунрин хуьре мини-футболдай машгьур меценат Жигерхан Сулейманован савкьатар патал гьар йисуз тухузвай турнир кьиле фена.
Акъажунрин нетижада 1-чка — КьакIарин, 2,3,4-чкаяр Луткунрин командайри кьуна. Гъалибчийриз грамотаярни пулдин пишкешар гана.
* * *
13-14-августдиз Ахцегьа, Физкультурникдин йикъаз талукьарна, мини-футболдай райондин чемпионат кьиле фена. Тешкилатчийрин арада муниципалитетдин администрациядин спортдин, жегьилрин сиясатдин ва туризмдин рекьяй отдел, футболдин “Ахцах” клубдин президент Мегьамед Алишев ва футболдай кардик квай ДЮСШ авай.
Акъажунра 7 командади иштиракна. Абурун арада Докъузпара райондин командани авай. Нетижада 1-чка “Усугъчай”, 2-чка — “Ветераны”, 3-чка “МЧС” командайри кьуна. Гъалибчийриз грамотаярни савкьатар гана.
* * *
Физкультурникдин йикъан сергьятра аваз футболдай акъажунар Мегьарамдхуьрени тешкилнавай. Къуюстанрин ва Гъепцегьрин хуьрерин командайрин арада кьиле фейи матчда 6:4 гьисабдалди Къуюстанрин команда гъалиб хьана.
* * *
Мегьарамдхуьруьн райондин Къуюстанрин хуьре воркаут-майдан кардик акатнава. Спортдин цIийи майдан милли «Демография» проектдин сергьятра аваз кьилиз акъудзавай федеральный программадин куьмекдалди туькIуьрна.
32×10 метрдин кьадардин майдан хуьруьн стадиондин мулкарал туькIуьрнава. Райондин администрациядин пресс-къуллугъди хабар гузвайвал, объектдиз 2,2 миллион манат пул акъатна.
«Лезги газет»
