Алатай гьафтедин эхиримжи юкъуз Дагъустан Республикадин Гьукуматдин Председателдин заместитель Нариман Абдулмуталибов кIвалахдин рекьяй (нубатдин сеферда) Сулейман-Стальский районда хьана. Райондин Кьил Саид Темирханов ва администрациядин жавабдар пешекарарни галаз ам «Развитие образования» госпрограммадин «Модернизация школьных систем образования» проектдай районда капитальнидаказ ремонт хъийизвай 4 школадиз ва «Комплексное развитие сельских территорий»» госпрограммадай эцигна саки акьалтIарнавай, алай вахтунда дуьзмишунин кIвалахар тухун давамзавай Агъа-СтIал Къазмайрин цIийи школадин объектдал фена, анра ремонтрин ва эцигунрин кIвалахар кьиле тухузвай гьаларихъ галаз таниш хьана.

Къейд ийиз кIанзава хьи, Агъа-СтIал Къазмайрал эцигзавай цIийи школадин заказчик «Дагсельхозстрой» ГКУ, подряддин организацияни «Дагсвязьинвест-1» ООО я. Школада 460 аялдиз чкаяр жеда.

Капитальный ремонтрин кIвалахрикай рахайтIа, абур Кьасумхуьруьн 1-нумрадин юкьван школада (1 ва 2-мертебаяр), Кьулан-СтIалрин юкьван школада учебный корпус, ЦIийи Макьарин юкьван школада 2 корпус, ЦIийи поселокдин юкьван школада 1 корпус ремонт хъийида.

Н. Ш. Абдулмуталибова лагьайвал, образованидин организацийрин объектар эцигун ва капитальнидаказ ремонт хъувун ДР-дин Кьил Сергей Меликован ва Гьукуматдин Председатель Абдулмуслим Абдулмуслимован кьетIен гуьзчивилик ква. Ам нубатдин сеферда райондиз атунни гьам эцигунрин, гьамни ремонтрин кIвалахрал гуьзчивал артухаруникай, кIвалахрин еришар йигинаруникай, амай кимивилер арадай акъудуникай ибарат я. И рекьерай РД-дин Гьукуматдин Председателдин заместитель Нариман Абдулмуталибова райадминистрациядин ва подряддин организацийрин пешекарриз тапшуругъар гана, абур кьилиз акъудун вичин гуьзчивилик кутунвайди къейдна.

Хазран Кьасумов