Россиядин яракьлу къуватри Донбассдин чилел миллетбазар терг авун патал дяведин махсус серенжемда кьегьалвилинни баркаллувилин чешнеяр къалурзава. Гьайиф хьи, телефвилерни жезва. 6-майдиз душманрихъ галаз женгина ахцегьви жегьил офицер, ротадин командир Тамерлан Ильясовни телеф хьана. Женгина кьетIен дирибашвал къалурунай РФ-дин Президент В.В.Путинан къарардалди чи ватанэгьлидиз “Жуьрэтлувиляй” орден гана.
Гьукуматдин шабагь игитдин диде-бубадив Ахцегьа В.Эмирован цIийи хъувунвай памятникдин патав РД-дин Гьукуматдин Председателдин заместитель Рамазан Жафарова вахкана. И кардиз талукь митинг райондин дишегьлийрин советдин председатель Таира Муспагьовади кьиле тухвана. Анал “Ахцегь район” МР-дин кьилин заместитель Вадим Агъасиев рахана.
— Женгера лап викIегьбур телеф жезва. Абуру чпин гьерекатралди амайбур хуьзва. Ротадин командир Тамерланани лап четин вахтунда душмандин цIай вичел желбна, чан къурбанд авуналди, гъилик квай аскерар къутармишна. Тамерлана жуьрэтлувилин чешне къалурна. Игитдин тIвар эбеди авун патал чи фикирдик Тамерлан Ильясован тIварунихъ са куьче ягъун ква. Сагърай диде-буба Ватан патал ихьтин хва тербияламишай. Ильясоврин хизан чна чи къайгъударвиликай хкуддач.
Митингдин иштиракчияр, игитдин руьгьдиз гьуьрмет авун яз, са декьикьада кисна акъвазна. Рамазан Жафарова лагьана:
— Ватан хуьнин важиблувал кьатIунуналди, офицервилин рехъ-кьисмет хкязавай, лазим атай чIавуз чанни къурбанд ийиз гьазур чи дирибаш жегьилрал за дамахзава. РД-дин руководстводин векил, генерал яз, за мукьвал-мукьвал ихьтин мярекатра иштиракзава. Жегьил аскер, офицер телеф хьун, гьелбетда, адан хизандиз, мукьва-кьилийриз сагъ тежедай рикIин хер я. Ватан патал чан гайи Тамерлан Ильясован тIвар несилрин рикIера эбеди яз амукьун патал адан тIварунихъ куьче ягъун кутугай кар я. 1-сентябрдиз школайра тешкилдай жуьрэтлувилин ачух тарсар Тамерлан Ильясован игитвилиз бахшна кIанда. Герек гьар садаз адан тIвар чир жен, адан кьегьалвал чешне жен.
Ада Нариман Велибеговичавни Наира Жалиловнадив, кьегьал хцин ядигар яз, “Жуьрэтлувиляй” орден вахкана.
Митингдал Тамерлан Ильясован лайихлувилер рикIел хкунин, адаз рагьмет гъунин ва хизандинни багърийрин дерт кьезиларунин келимаяр гваз гьакI Ахцегь, Рутул ва Докъузпара районрин военком Рафик Мегьамедов, райондин ветеранрин советдин председатель Нажмудин Гудаев, жегьилрин парламентдин председатель Рустам Шакиров, шаир Жамиля Гьажиева, Тамерлан Ильясован классдин руководитель хьайи Раида Шерифалиева рахана.
Эхирдай игитдин баде, РД-дин лайихлу муаллим, РФ-дин образованидин лайихлу работник Инжихан Жалиловади Ильясоврин хизандин патай райондин ва республикадин руководстводиз, митингдин иштиракчийриз сагърай лагьана. “Инал Тамерлан Ильясован тIварунихъ ада кIелай школа ягъунин теклиф атана. Ахцегьрин 2-нумрадин школа чи дамах тир кьегьал хва Валентин Эмирован тIварунихъ гала. Гьавиляй Ахцегьа адан тIварунихъ цIийиз эцигзавай спорткомплекс ягъун кутугнава, гьикI хьи, Тамерлан халис аскер — пагьливан (боксёр) тир”, — алава хъувуна ада.
Дашдемир Шерифалиев
