Хуьруьгрин хуьре авай минара галай жуьмя-мискIиндин

дарамат цIийикIа туькIуьр ­хъувуниз 5 миллион манат пул чара ийида

Ахцегь райондин Хуьруьгрин хуьре авай минара галай жуьмя-мискIиндин дарамат чкIидай гьалдиз атанвайдакай чна ви­ликдай газетдай хабар ганай. РикIел хкин, июлдин вацран эвел кьилера и месэладиз талукь яз тарихдин илимрин кан­дидат Шерибан Пашаевадин “ЧукIунин часпардал” тIвар алай макъала акъатнай. Авторди тарихдин надир имарат михьиз терг хьунин хаталувилик акатнавайди къейднавай ва медениятдин ирсинин объ­ект­рин саламатвилин пата­хъай жавабдар идарайриз тади гьалда герек серенжемар кьабулуниз эвер ­ганвай.

Ш.Пашаевади вичин макъалада къа­рагъарнавай месэладин жигьетдай чна РД-дин медениятдин ирс хуьнин рекьяй кардик квай Агентстводивай бая­нар гун тIалабнай. Агентстводин пресс­-къуллугъдин векилди Хуьруьгрин жуьмя-мискIин­дин дарамат гьа­къи­къатдани чукIунин хаталувилик квайди тестикьарнай ва Рос­имущест­водин РД-да авай Управленидиз (объ­ектдин патахъай жавабадарвал и идарадин хивева) арадал атанвай гьалариз талукь яз лазим тир серенжемар кьабулун патал чар рекье тунай.

Са акьван пара вахт арадай фенач, лугьудайвал, мурк юзана: Хуьруьгрин ми­нара галай жуьмя-мискIиндиз республикадин кьилевайбуру фикир гана. 11-августдиз Махачкъалада РД-дин Гьу­ку­матдин Председателдин заместитель Муслим Телякавован регьбервилик кваз Ахцегь райондин Хуьруьгрин хуьре авай медениятдин ирсинин федеральный ­дережадин метлебдин объектрин сиягьда гьатнавай минара галай жуьмя-мис­кIин цIийи­кIа туькIуьр хъувунин месэлаяр веревирдна. Идакай “Лезги газетдиз” Гьукуматдин пресс-къуллугъди хабар гана.

Совещанидин эвел кьиляй республикадин вице-премьерди объект чкIи­дай гьалда авайдакай ва, эгер ам чкIай­тIа, па­тарив гвай яшайишдин кIва­ле­ризни объектриз зиянар жедайдакай хабар гана.

“Жуьреба-жуьре официальный ­чарар-цIарар гьазурунивай къерех хьун ва жезмай кьван фад цIийикIа туькIуьр хъувунин кIвалахрив эгечIун патал 1 йи­сан къене Хуьруьгрин жуьмя-мис­кIин Дербентдин музей-заповедникдик кутазва.

Веревирдзавай месэладин тереф Дагъустандин Кьил Сергей Меликовани­ хвенва. Ада гьазурвилер акунин жи­гьет­дай авай вири крар вахтунда гьял­на­, Дербентдин музей-заповедникдин бюджетдинбур тушир такьатрихъ цIийи­кIа туь­кIуьр хъувунин кIвалахрив эге­чIун буйругънава.

МискIиндин дарамат музей-заповедникдик кутун патални са кьадар вахт герек жеда. И месэла кьилиз акъу­дунихъ галаз санал мискIиндин дарамат чкIи­дал­ди жезмай кьван фад ремонтдин кIвалах­рив эгечIна кIанда”, — лагьана М.Телякавова.

РикIел хкин, къати марфар къунин нетижада жуьмя-мискIиндин цларай, минарадай сварар атанва, къавай тIи­лияр къвезва, къандахра яд гьатзава. Марф къвайи гьар сеферда ихтилат физвай надир имаратдин цлар чкIизва.

“Лезги газетдиз” РД-дин Гьукуматдин пресс-къуллугъдин векилди алава хъувурвал, минара Росимуществодин РД-да авай Управленидик акатзава. Яни имарат чукIун тавун патал вири серенжемар и идаради кьабулна кIан­зава. Амма Управленидин векилри са жавабдарвални гьиссзавач, къенин йикъалди абуру арадал атанвай гьаларин вилик пад кьунин карда са камни къачунвач.

Совещанидин кIвалахда иштиракай инженеррин гафаралди, тарихдин метлеб авай имарат хуьн патал сифте нубатда илимдинни проектдин документация гьазурна ва эцигунин кIва­лахрив эгечIна кIанзава. Минарани галаз жуьмя-мискIин­дин дарамат цIийи­кIа туькIуьр хъувуниз, пешекаррин ­гьисабунралди, 5 миллион манат пул акъатда.

Веревирдерин нетижаяр кьадайла, М.Телякавова лап куьруь вахтунда ви­чихъ­ медениятдин ирсинин объектар цIийикIа туькIуьр хъувунин жигьетдай тежриба ва лицензия авай пудратчи кархана жагъурна, ам кIвалахдал желб авун буйругъна.

Къейд ийин хьи, совещанида РД-дин культурадин министрдин заместитель Мухтар Къурбанова, Дербентдин музей-заповедникдин везифаяр вахтуналди тамамарзавай Велиюлла Фаталиева, РД-дин медениятдин ирс хуьнин рекьяй кардик квай Агентстводин, Росимуществодин Дагъустанда авай Управленидин векилри, инженерри иштиракна.

Агьмед Магьмудов