Ахцегь райадминистрациядин кьилин заместитель Вадим Агъасиеван регьбервилик кваз терроризмдиз акси комиссиядин нубатдин заседание хьана. Адан кIвалахда РД-дин Гьукуматдин Председателдин заместитель Рамазан Жафарова, Ахцегь погранчастунин начальник, полковник Алексей Самойлова, Дагъустанда РФ-дин ФСБ-дин Погран­управленидин начальник  Андрей Карпенко­ди, РД-дин АТК-дин векил Тимур Зербалиева­, РД-дин Халкьдин Собранидин депутат Мегьамед Алиханова, Ахцегь райондин проку­рор Тимур Мегьамедова, Ахцегь, Докъузпара ва Рутул районрин военный комиссар Ра­фик Мегьамедова, Дербент шегьерда УФСБ-дин 2-отделдин къуллугъчи Заур Мегьамедова, Россиядин МВД-дин полициядин “Ахтынский” отделдин начальник Вадим Алиева, РУО-дин начальник Алмас Гьажиева, муниципалитетдин АТК-дин членри, райондин школайрин директорри ва теклифнавай маса юлдашри иштиракна.

Заседанидал ихьтин месэлаяр веревирд­на: “Жегьилрин арада террориствилин идеология чукIунин вилик пад кьун”, “Образованидин идарайра общественный хатасузвал таъминарун”, “Терроризмдин идеологиядиз акси яз “Цуругърин хуьр” СП-дин администра­цияди кьиле тухузвай кIвалахдин гьахъ-гьи­саб”, “Халкьдин арада законсуздаказ яракьар­ чукIуниз рехъ гузвай шартIар ва гьалар арадай акъудунин серенжемар”.

Алмас Гьажиева вичин докладда къейд авурвал, школьникрин арада террориствилин идеологиядиз акси таблигъат тухунал санлай­ 60-далай артух завучар, психологар ва классрин руководителар машгъул я. Абуру классрин сятера, ачух тарсара гъавурдик кутунин­ кIвалах тешкилзава. Районда школадиз текъвез, диде-бубайринни тербиячийрин гуьзчивилик квачиз, чеб чпин ихтиярда авай аялар авач. Алава образовани­дин 8 идарадиз 2 агъзурдалай артух ва 2 спортшколадиз саки агъзурдав агакьна ая­лар желбнава. Жегьилар пиянискавилиз, наркоманиядиз кьил ягъуникай, абур об­ще­­­ст­­водиз акси идеологиядин таъсирдикай хуьнин ва уьмуьрдин активный, сагълам рекьел гъунин мураддалди гьар йи­суз “Защита” тIвар алаз про­филак­ти­кадин операция кьиле тухузва.

Кьвед лагьай месэладай малумат Вадим Алиева гана. “Школайрин векилрихъ галаз са­нал чна саламатзавачир, яшайишдин четинвилер авай хизанрал кьил чIугвазва, жегьилрихъ галаз тербиядин темайрай рахазва. Школайра хатасузвал таъминарунин гьалар ахтармишна, малум хьайивал, бязи чкайра турникетар авач, видеокамерайри кIва­лахзавач, школайрин автобусар лазим тирвал тадаракламишнавач ва икI мад. И нукьсанар кIелунин цIийи йис алукьдалди арадай акъудун лазим я”.

“Цуругърин хуьр” СП-дин кьил Шимсидин­ Мерданов терроризмдин идеологиядин ви­лик пад кьунин карда хуьруьн школада, ки­мерал ва общественный чкайра кьиле тухузвай тербиядин серенжемрикай рахана.

Мярекатда иштиракай Рамазан Жафарова ва генерал-лейтенант Андрей Карпенкоди районда АТК-дин комиссияди тухузвай кIва­лахдилай разивална.

Дашдемир Шерифалиев