Малум тирвал, алай йисан 24-февралдилай Рос­сия­дин Федерациядин Яракьлу Къуватри Донбассдин районра военный махсус серенжем кьиле тухузва. Ана Россиядин армиядин частара къуллугъзавай лезги офицерри, гъвечIи командирри, аскерри иштиракзава ва тапшуругъар викIегьвилелди тамамарзава. Бязибурукай чна виликан нумрайра кхьенай. Къе Белиждин поселокдай тир пуд кьегьалдикай ихтилат ийиз кIанзава. Абуру реактивный артиллериядин дивизионда къуллугъзава.

Реактивный артиллериядин дивизиондин командирдин заместитель, майор Алиметов Абдулмурада махсус серенжемдив эгечIай сифте йикъарилай Донецкдин ва Луганскдин республикаяр хуьнин карда уьтквемвилелди иштиракзава. А.Алиметован жуьрэтлувилин ва пешекарвилин гьерекатри дивизиондиз командирри вилик эцигзавай тапшуругъар лап хъсандиз кьилиз акъуд­дай ва хуьрер Украинадин миллетчийрикай азаддай мумкинвал гузва.

Нубатдин сеферда женгиник экечIайла ва къайдадикай хкатнавай яракьар женгерин майдандай ахкъуддайла, Абдулмурада халисан викIегьвал къалурна. Адан гъавурда аваз тешкилай гьерекатри хейлин яракьар ва женгинин машинар къутармишдай мумкинвал гана.

Идалай алава яз, са женгина, душмандин акъваз тийизвай ягъунар квазни такьаз, майор Алиметова къайдадикай хкатай кьве машин ва маса яракьар саламат чкадиз акъудна. Ида дивизиондиз гуьгъуьнлай женг давамардай ва душмандиз дуьзгуьн жаваб гудай шар­тIар яратмишна.

Дивизиондин артиллериядин кьвед лагьай бата­реядин транспортдин отделенидин командир, сержант Таибов Расулан гьерекатрилай, алакьунрилай, жен­гера вич тухузвай тегьердилай командирар пара рази я. Расул Тайибован викIегь гьерекатри дивизиондиз виликди фидай, командиррин тапшуругъар тамамвилелди кьилиз акъуддай мумкинвал гузва. Душмандихъ галаз женгер кьиле физвай вахтунда Тайибова миллетчийрихъ галаз женг чIугвазвай чи батареядив вахтунда яракьар ва медикаментар агакьарна. Маса сеферда сержант Расула женгер кьиле физвай майдандал махсус машинда аваз реактивный снарядар агакьарна. Ида Россиядин мотострелокриз са шумуд хуьр душмандин дестейрикай азаддай мумкинвал гана.

Реактивный артиллериядин батареядин женгинин машиндин командир, младший сержант Темирханов Владиславни викIегь аскеррикай сад я. Ада командирри вичел тапшурмишзавай гьар са тапшуругъ вахтунда ва тамамвилелди кьилиз акъудзава, душмандиз мурдар ниятар кьилиз акъуддай мумкинвал гузвач.

Нубатдин женгина хер хьанвайтIани, женгинин машиндин командирди вичин алакьунар къалурна: адан дуьз гьерекатар себеб яз, душмандин бронетехникани хейлин аскерар терг ийиз хьана. Владислав Темирханован гъилик квай аскерри Украинадин фашистрин радиолокационный кьве станция, душмандин гуьзетдай са пунктни тергна.

Ихьтин мисалар мадни гъиз жеда. ГьикI лагьайтIа, махсус серенжемда уьтквемвилелди, игитвилелди иштиракзавай дагъустанвияр садни кьвед туш.  Аскервилин кьинез, Ватандиз вафалувал къалуруналди, Россиядин офицерри ва аскерри важиблу везифа тамамарзава. РагъакIидай пата чи Ватандиз акси къуват яз ишлемишзавай Украинадин фашистар, бандеровчияр  терг­зава. Республика чIулав хумадикай азадзава. Луганскдин Халкьдин Республикадин шегьерар, хуьрер, мулкар­ миллетбазрикай азаднава. Ихьтин агалкьунрик чи ватан­эгьлийри кутунвай пайни гъвечIиди туш. Гьар юкъуз­  До­нецкдин Республикадин мулкарилайни фашистар чукурзава. Амма инсанвилин вири ерияр квадарнавай неонацистри чпин алчах крар акъвазарзавач. Ислягь шегьеррал, хуьрерал ракетайрай, артиллериядин тупарай бомбайрин, минайрин, гуьллейрин хар къурзава. Гьар юкъуз аялар, дишегьлияр, яшлубур телефзава. Яргъал алач, чи кьушунрин басрухдик къе-пака Авдеевкани фашистрикай михьи жеда, Донбассдин ва Украинадин маса районрин агьалийрини регьятдиз нефес къачуда. Чи кар гьахълуди я. Чун гъалибни жеда.

ИкI викIегьдиз, командирри аферин лугьуз къул­лугъзавай, женг чIугвазвай чи кьегьалриз баркалла! Къуй абур сагъ-саламатдиз чпин диде-бубайрин патав хтурай.

Хийир Эмиров