Дагъустанда коронавирусдик начагъ жезвайбурун кьадар артух хьун давам жезва. “Лезги газетдиз” РД-дин здравоохраненидин министерстводин пресс-къуллугъди хабар гайивал, республикадин духтурханайра азарлуяр кьабулдай чарпайрин кьадарни гзафарзава. Мисал яз, алай вахтунда абурун кьадар 52-дав  агакьзава. Коронавирус акатнавайбур исятда Республикадин инфекцийрин центради, Каспийскдин стационарди ва Ботлих, Лак районрин кьилин духтурханайри кьабулзава.

Лагьана кIанда, РД-дин здравоохраненидин министерстводин къарардалди, республикадин агьалияр сагъар хъийидай вири идарайра тIегъуьндиз акси серенжемар кардик кутунва. Абурун арада маска алукIун, дезинфекция авун, духтурханайриз къвезвай инсанрин бедендин ифин ахтармишун ва масабур ава. Идалайни гъейри, чпин яшар 65 йисалай алатнавай агьа­лийриз медицинадин рекьяй кIвалин шартIара къуллугъзава.

Коронавирус акатзавайбурун кьадар гзаф жезвайди фи­кирда кьуна, жемиятдин сагъламвилин ва медицинадин профилактикадин рекьяй кардик квай Республикадин центрада (Ма­хачкъала шегьер, Аскерханован тIварунихъ галай куьче, 1 “а” нум­радин дарамат) ашкъи авай гьар садавай коронавирус, рикIинни дамаррин, маса азарар квани-квачни тайи­нарзавай тест вахкуз, ахтармишунар кьиле тухуз жеда.

Мукьвара РФ-дин здравоохраненидин министр Михаил Му­рашкодин регьбервилик кваз кьиле фейи совещанидал (ана уьл­кведин регионрин здравоохраненидин минис­трри иштиракна) къейд авурвал, тест вахкунихъ коронавирусдин азардин вилик пад кьунин рекье еке метлеб ава. Азар акатнавайди гьикьван фад чир хьайитIа, гьакьван фад (тадияр гудалди) ам сагъардай мумкинвални жезва.

6-августдин делилралди, Дагъустанда са йикъан къене коронавирус акат­навай 42 дуьшуьш винел акъудна. Исятда  республикадин  духтур­­ханайра вирусдик начагъ 37 кас са­гъар хъийиз­­­ва. РД-дин здравоох­ра­не­нидин ва Роспотребнадзордин ла­бора­торийра ахтармишзавай тестрин кьадар са йикъан­ къене 4000-дав агакь­­зава.

Михаил Мурашкоди совещанидал гьакIни къейд авурвал, тIугъвалдин лепе тамамдиз къарагъдалди коронавирусдиз акси рапар ягъун чарасуз я. Сад лагьай сеферда раб ягъайдалай кьулухъ 6 варз алатайла кьвед лагьай рабни ягъиз жезва. Жуьреба-жуьре азарар аваз коронавирусдиз акси раб ягъун­ къадагъа тир агьалийриз “Эвушелд” раб язава. Аптекайра и дармандин къимет 50 агъзур манат я. Республикадин шегьеррин ва районрин духтурханайра и раб пулсуздаказ ягъиз жеда.

ТIугъвалди мад вичикай хабар гузвай арада чна мукъаятвал квадарна ви­же къведач. Маска алукIун, вахт-вахтун­да гъилер чуьхуьн, алазни-алачиз гзаф кьадар инсанар кIватI жезвай чкайриз тефин, коронавирусдиз акси раб ягъун­. Духтурри къалурзавай и ва са жерге ма­са меслятри коронавирус акатунин вилик пад кьаз куьмекда.

Агьмед Магьмудов