Алатай киш юкъуз Мегьарамдхуьруьн райондиз, кьиле РД-дин Гьукуматдин Председателдин заместитель Нариман Абдулмуталибов аваз, гьукуматдин делегация кIвалахдин рекьяй мугьман хьана. Идакай РД-дин гьукуматдин пресс-къуллугъди хабар гузва.
Делегациядик РД-дин хуьруьн майишатдин ва недай суьрсетдин министр Мухтарбий Аджеков, РД-дин “Минмелиоводхоз” ФГБУ-дин кьил Залкип Къурбанов ва РД-дин балугъчивилин майишатдин рекьяй Комитетдин руководитель Виктор Руденко квай.
Мугьманар муниципальный тешкилатдин кьилин везифаяр вахтуналди тамамарзавай Фейруддин Рагьимханова кьабулна. Мегьарамдхуьруьн райондин мулкунал алай вахтунда вице-премьерди са жерге майишатрин кIвалахар ахтармишна ва идалай вилик республикадин Кьил Сергей Меликован тIварцIел хъвадай ва дигидай цин месэла гьялунин карда куьмек гунин гьакъиндай арзаяр рекье тур Муьгъверганрин, Киркарин, Чепелрин, Вини Чахчарин агьалийрихъ галаз гуьруьшмиш хьана.
Райондин хуьруьн майишатдин объектар ахтармишунин кIвалах инвестицийрин КФХ “Багъ” проектдилай башламишна. Ина фермервилин майишатдин регьбер Керимхан Абасовахъ галаз санал делегация ичин багъда къекъвена, емишар кIватIунин технологийрихъ, яд гунин ва миянардай шейэр вегьедай къайдайрихъ галаз таниш хьана, цин гьамбарханадиз килигна.
“Им алай аямдин фад арадал къведай ва лап гзаф кьадарда бегьер гъидай жуьредин 140 гектардин (майишатдин умуми майдан 203 гектардиз барабар я) багъ я. Емишар гьасилун патал ина стIал-стIал яд гудай къайда ва Европадин технологияр ишлемишзава. Ичин багъдин са гектардай ина 30-40 тонн бегьер кIватIзава. Проектдин къиметлувал 300 миллион манатдилай гзаф я. Йисан кьиляй-кьилиз ина 25 касди кIвалахзава, сезондин вахтунда — 200 касди. Проект уьмуьрдиз кечирмишунин кIвалах нетижалудаказ кьиле физва, амма чаз багъдив агакьарзавай рекье къир цунин месэладиз килигун тIалабиз кIандай”, — къейдна К.Абасова.
“Багъ” КФХ-дин вилик мукьвал йисара гзаф бегьер гудай багъдин майдан яваш-яваш 500 гектардив агакьардай месэла ква. ГьакIни пландик алай аямдин, чимивилел датIана гуьзчивал ийиз жедай ва 10 000 тонн емишар хуьдай, гьакIни сортировка ийиз жедай чкаяр ва талукь тир тадаракар авай гьамбархана эцигунин месэла ква. Ам кьве паюникай ибарат я.
Идалай гуьгъуьниз Гьукуматдин Председателдин заместитель райондин вад хуьруьн агьалийрихъ галаз гуьруьшдал фена. Дигидай ва хъвадай яд тахьунин месэлади хуьрерин агьалийрик къалабулух кутуна гзаф йисар я. Арадал атанвай хци гьалар себеб яз, хуьрерин тайин кьадар агьалийриз хуьруьн майишатдин суьрсет гьасилунин месэладал машгъул жедай мумкинвал авач.
Идахъ галаз алакъалу яз, анжах Муьгъверганрин 100 гектар чил гадарнавайбурук акатзава, куьмекдин хсуси майишатар патал чара авунвай мад 40 гектар иесийривай ишлемишиз жезвач. Агьалийрин четин месэлайрихъ яб акалайдалай кьулухъ Нариман Абдулмуталибова къейд авурвал, арадал атанвай гьалдиз талукь яз лазим тир серенжемар кьабулда.
“Им багьа къиметдин проект я, сифтедай адаз талукь проектдинни сметадин документация гьазурна кIанда. Проектди кIвалахун патал яд гана кIанзавай чилерни гьазурна кIанзава”, — лагьана вице-премьерди.
Ада гъавурда турвал, месэла гьялун патал райондин ва хуьрерин администрацийри агьалийрихъ галаз санал чпин чилерин участокар дуьздаказ регистрация авун, чеб иесияр тирди тестикьарзавай документар къачун, ичIизвай чилер еримлу авунин планар туькIуьрун, гьакIни хъвадай ва дигидай цин гьакъи гун лазим я.
Месэла вахтуналди гьялун патал Залкип Къурбанова хъвадай яд агакьарзавай насосрин станция къайдадиз хкун хиве кьуна.
Фейрудин Рагьимханова гьакIни къейд авурвал, хъвадай цихъ галаз алакъалу месэла гьялун патал гъиле кьунва — Сад тир госзаказчик-застройщикди проектдинни сметадин документация гьазурнава ва алай вахтунда тендер малумарнава.
Хуьрерин жемятдихъ галаз гуьруьшмиш хьайидалай кьулухъ делегация райондин мулкунал алай Гилийрин хуьре авай “Къара-су” ва Ярагъ-Къазмайрин хуьре авай «Булах» балугъчивилин кьве майишатдиз мугьман хьана.
Кьве майишатдани вице-премьерди мулкар ахтармишна, кIвалахда арадал къвезвай четинвилерикай хабар кьуна, гьакIни майишатар виликди тухунин мумкинвилер веревирдна.
Балугъчивилин майишатриз фейидалай кьулухъ ада райондин кьиле авайбуруз муниципалитетда авай хуьруьн майишатдин суьрсет гьасилзавайбурувни гъвечIи ва юкьван карчивилин векилрив алай вахтунда государстводин патай куьмекдин гьакъиндай малуматар авай буклетар агакьарун теклифна.
Амина Муслимова
