Кеферпатан Кавказдин крарин рекьяй Россиядин Федерациядин министр Лев Владимирович Кузнецов нубатдин сеферда Дагъларин уьлкведиз мугьман хьанва. Ам кьве юкъуз республикадин гьаларихъ галаз таниш хьана. Ада цIийиз ачухзавай имаратрал кьил чIугуна, агьалийрихъ, прессадин векилрихъ галаз гуьруьшар кьиле тухвана. Сифте нубатда ада РД-дин Гьукуматдин Председатель Абдусамад Гьамидовахъ галаз Дербент шегьердин гьуьлуьн къерех аваданламишна куьтягьунин шад мярекатда иштиракна.
Дербент шегьердин 2000 йисан юбилейдихъ галаз алакъалу яз тухузвай аваданламишунин кIвалахар гьеле давам жезва. И кар гьуьлуьн къерех гуьрчегаруни, ана агьалийри ва мугьмандиз къвезвай инсанри дуьзгуьндаказ ял ядай имаратар эцигуни субутарзава.
Кеферпатан Кавказдин крарин рекьяй РФ-дин министр Лев Кузнецов Дербентдиз са шумуд сеферда атана. Гилани “Дербент шегьер” муниципалитетдин кьил Малик Баглиева ва шегьерэгьлийри ам хушвилелди кьабулна.
Къейд авун лазим я хьи, министр гьуьлуьн къерехда авунвай кIвалахрилай рази яз амукьна. “Кеферпатан Кавказдин Федеральный округ еримлу авун” федеральный госпрограммадин гьисабдай ахъайнавай пулдин такьатар (406 млн-федеральный ва 21,4 млн — республикадин бюджетрай) ишлемишуналди, къадим шегьердин гьуьлуьн къерех (8,6 гектар, 38 агъзур квадратный метр ва 4 агъзурдав агакьна агьалияр кьабулдай пляж) проектда авайвал гуьрчегарнава. Административный дарамат, машинар акъвазардай чкаяр, хкаж хьана, гьуьлуьз тамашдай майданар, кафеяр, батмиш жезвайбур къутармишдай станция ва маса объектар эцигна куьтягьнава. Велосипедраллаз фидайбуруз, сейрда къекъведай инсанриз махсус рекьер туькIуьрнава, спортдин ва аялрин майданар кардик кутунва. Гьуьлуьн къерех тирвал хкаж хьанвай кIвалерин къецел патарни гуьрчегарнава. Х.Тагъиеван куьчедин 3 километрдин мензилда асфальтни тунва. Вири и крари Дербент шегьердин и пай гьар са касдиз хуш жедай къайдадиз гъанва.
— За Россиядин Федерациядин Президент Владимир Путиназ, Кеферпатан Кавказдин крарин рекьяй РФ-дин министр Лев Кузнецоваз, РД-дин Кьил Рамазан Абдулатиповаз, РД-дин Гьукуматдин Председатель Абдусамад Гьамидоваз вири шегьерэгьлийрин патай рикIин сидкьидай сагърай лугьузва, — малумарна Малик Баглиева. — Юбилейдиз гьазурвилер акунин вахтунда чи къадим шегьерда гзаф кьадарда цIийивилер арадал гъана. Ингье чи шегьерда мад са гуьрчег ва вирида гьейранвалдай, инсанри хушвилелди ял ядай чка артух хьана. Гьуьлуьн къерех туькIуьриз гъиле кьурдалай кьулухъ анал физвай кIвалахрал талукь вири руководителри гуьзчивална, вахт-вахтунда пулдин такьатар ахъайна ва устIарри, инженерри, маса пешекарри гьакъисагъвилелди зегьмет чIугуна. Заз къе абурузни сагърай лугьуз кIанзава.
Лев Кузнецова дербентвийриз ял ядай ва вири месэлаяр фикирда кьуна туькIуьрнавай набережная тебрикна ва Дербент шегьер Россиядин вири регионрай инсанар ял ягъиз къведай туризмдин центрадиз элкъуьрун патал мадни эцигунрин, реконструкциядин кIвалахар давамардайдакай лагьана.
Шад мярекатда Дагъустан Республикадин Гьукуматдин членри, Халкьдин Собранидин депутатри, Кьиблепатан Дагъустандин районрин муниципалитетрин кьилери, общественный, ветеранрин, жегьилрин, диндин организацийрин, прессадин векилри иштиракна.
Л.Кузнецов республикадиз къведалди вилик РД-дин Гьукуматдин Председатель Абдусамад Гьамидов РД-дин Халкьдин Собранидин депутатрихъ, гьукуматдин членрихъ ва общественностдин векилрихъ галаз республикадин перинатальный центрадиз фена. Ам ишлемишиз вахкуник Лев Владимировичан алахъунрин еке пайни ква.
Къейд авун лазим я хьи, и цIийивилер неинки Махачкъала ва Дербент шегьерар, гьакI республика патални важиблу метлеб авайбур я. Меркезда ачухнавай перинатальный центр Россиядин Президент Владимир Путинан теклифдалди арадал гъанвайди я. Ам герек вири шейэралди тадаракламишунин карда “Ростех” тIвар алай государственный корпорацияди ва адан генеральный директор Сергей Чемезова еке куьмек гана. Малум тирвал, центрада эцигнавай тадаракрин 50 процент Россиядин карханайри акъуднавайбур я. Абур дуьньядин тIвар-ван авай фирмайри акъудзавай медицинадин техникадилай са куьналдини усал туш.
Центр ачухдайла къейд авурвал, ина вини дережадин чирвилер, тежриба авай 800 пешекарди кIвалахда. Абуру йиса 8 агъзурдав агакьна аялар хазвай дишегьлияр кьабулда. Центрада гинекологиядин, акушервилин, педиатриядин рекьяй начагъбуруз вири жуьредин куьмекар гуда. Ина гьакI анестезиологиядин, реанимациядин ва интенсивный терапиядин отделенияр кардик кутунва. Реанимациядин отделенида гьатта 500 граммдин заланвал аваз дуьньядиз атанвай аялризни вири рекьерай куьмек гудай ва абур сагъдиз кIвачел акьулддай мумкинвилер ава.
Шад митингдал рахайбурун ихтилатрин мана сад тир: аялар чи уьмуьрдин цуьквер, бахт, чи гележег я. Гьавиляй абур сагъламбур, ватанпересвилин, ахлакьдин, марифатдин тербия авайбур, зегьметдал рикI алайбур яз чIехи авун чи буржи я. Республикадин вири диде-бубайриз дидейрин ва аялрин сагъламвал хуьниз къуллугъзавай центр ачухун тебрикна.
Хийир Эмиров
