1-июндилай 3-июндалди Санкт-Петербургда XXI международный экономический форум кьиле фена. Адан кIвалахда республикадин Кьил Рамазан Абдулатипован регьбервилик кваз Дагъустандин делегациядини иштиракна.
“Дуьньядин экономикада цIийи пайгарвал жагъурунин рекье” лишандик кваз кьиле тухвай саммитдин кар алай серенжемрин сергьятра аваз пленарный заседанидал Россиядин Президент Владимир Путин рахана. Къецепатан уьлквейрай тир мугьманрихъни элкъуьрнавай вичин рахунра ада къейдна: “Рахунар кьиле тухунин, амадагвал авунин ниятралди куьне Россиядиз ийизвай итиждал чна рикIин сидкьидай къимет эцигзава. Чун саналди кIвалахиз, терефриз менфятлу проектар кьилиз акъудиз, дуьньяда вилик финин стратегиядин метлеб авай лап важиблу месэлаяр гьялунин карда санал кIвалахиз гьазур я. Анжах саналди, къуватар агудуналди, чалай алай девирдин пайгарсуз крар арадай акъудиз, дуьньядин экономика пайгардаказ вилик фин таъминариз, алишвериш авунин, дуьзгуьндаказ бягьс чIугунин адалатлу къайдаяр арадал гъиз, кесибвилин дережа агъузариз, яшайишдин лап хци месэлаяр гьялиз, терроризм, регионрин чуьруькар, миллетчивилин ва маса миллетар такIан хьунин фикирар чукIурун хьтин завалрал тIем гъиз алакьда. Алай вахтунда чун лап еке басрухрал расалмиш жезва. Инсандин гьерекатрин нетижада, тIебиидаказ кьиле физвай крарин чпин нетижадани планетадин экосистемадал гьалтзавай пар артух жеда. И месэлайрай дериндай кьил акъудун ва абур вири терефрихъай веревирд авун герек я”.
Петербургдин экономический форум уьлкведин Кеферпатан меркезда кьиле физ 20 йисалай алатнава. Гьа и девирда ам государствойрин регьберри, международный компанийрин кьилери, карчийрин тешкилатри, СМИ-ри чпин арада алакъа хуьнин кесерлу такьатдиз элкъвенва.
Форум кьиле фидай чIавуз Каспийск шегьер вичин талукь тир къурулушар ва инвестицийрин (промышленный) майданар галай, яшайишдинни экономикадин жигьетдай йигин ериш аваз вилик физвай чка хьиз раижна. И проектди 2025-йисалди шегьердин экономика йигиндаказ вилик тухудай, кIвалахдин цIийи 3 агъзурдалай виниз гьамишалугъ чкаяр тешкилдай, 17 миллиард манатдилай виниз инвестицияр желбдай мумкинвал гуда. И чIавалди цIудалай виниз инвестпроектар кьилиз акъудуниз талукь махсус икьраррал къулар чIугунва. Кьилди къачуртIа, консервиярдай промышленность патал емишринни майвайрин дуьзгуьн хаммал гьасилдай завод, логистикадин центр, “грин Сити” тIвар алаз агроиндустриальный парк, кIарас гьялдай завод, стIал-стIал яд гун патал герек лента ва шуьшединни пластикадин турбаяр гьазурдай завод, шуьшедин чIунар ва композиционный шейэр гьасилдай завод эцигун, “Каспийск” тIвар алаз индустриядинни эцигунрин комплекс тешкилун ва са жерге маса кIвалахар кьилиз акъудун фикирдиз къачунва.
Петербургдин XXI международный экономический форумдин сергьятра аваз Дагъустандин Кьил Рамазан Абдулатиповани “Просвещение” издательство” ОА-дин президент Владимир Узуна Дагъустан Республикада образование вилик тухунин ва адан ери хкажунин рекьяй икьрардал къулар чIугуна.
Санкт-Петербургда авай чIавуз Дагъустандин Кьил Рамазан Абдулатипов Кеферпатан меркезда яшамиш жезвай дагъустанвийрихъ галаз гуьруьшмиш хьана.
Петербургди санлай уьлкведин культурадиз еке таъсир ийизвайди къейд авуналди, республикадин руководителди чи регионди хейлин рекьерай къазанмишнавай агалкьунрикайни суьгьбетна.
Гуьруьшдин сергьятра аваз шабагьар вахкунин мярекатни кьиле фена. Невадал алай шегьерда яшамиш жезвай, Россиядин хушбахтвал патал хейлин йисара бегьерлудаказ кIвалахзавай машгьур дагъустанвийрив государстводин наградаяр вахкана.
Идан гьакъиндай РД-дин Кьилин ва Гьукуматдин Администрациядин пресс-къуллугъди хабар гузва.
