Дагъустан Республикадин Кьил Сергей Меликова 2022-йисан 22-июлдиз тухвай совещанидин бинедаллаз ва СтIал Сулейманан райондин администрациядин къарардалди яшайишдинни коммунальный майишатар 2022-2023-йисарин зулунни хъуьтIуьн сезондиз гьазурунин серенжемрин план тамамарунал ва яшайишдин объектрал тухудай кIвалахрал гуьзчивалдай комиссия тестикьарнай.
Райондин кьилин къарардалди ЖКХ-дин объектар зулунни хъуьтIуьн сезондиз гьазурунин рекьяй райондин штабни тестикьарнава.
Райондин мулкунал чимивилелди таъминардай ва теплосетдин тешкилатар алач. Муниципалитетда гзаф квартирайрин 17 кIвал ава. Яшайишдин и кIвалера арада масад авачиз идара авунин къайда хкянава.
Тухудай серенжемрин план ва комиссиядин составдикай делилар Дагъустан Республикадин яшайишдин инспекциядиз ва талукь тир маса идарайриз рекье тунва.
Зулунни хъуьтIуьн сезондиз гьазурвилер акунин кIвалахар кьиле физвай гьалдикай райондин администрацияди вацра садра РД-дин промышленностдин ва энергетикадин министерстводизни малумат гузва.
Алай вахтунда тестикьарнавай пландин бинедаллаз ЖКХ-дин объектри зулунни хъуьтIуьн сезондиз гьазурунин кIвалахар тухузва. Кьилди къачуртIа, райондин вири хуьрера, образованидин, здравоохраненидин ва культурадин идарайра цIаяр хъийидай сезондиз гьазурвилер аквазва. ИкI, образованидин тешкилатра цIаяр хъийидай къурулуш къайдада тунин кIвалахар тамамарзава.
Агъа СтIалрин юкьван мектебда газдин 6 котел гъили туькIуьрнавайбур я. Абур дегишарунин лазимвал ава. Кьасумхуьруьн 1-нумрадин СОШ-да авай 2 котелдикай сад къайдада авач.
Курхуьруьн 1-нумрадин СОШ-дин 2 котелдикай сад чIурузва. Герейханован 2-нумрадин мектебдин 2-корпусдиз чимивал гузвай котелни ремонт хъувунин чарасузвал ава, Вини СтIалрин школадин 2 котелдикай сад кIвалахиз жедай гьалда авач.
Хтунрин ва Пиперхуьруьн мектебриз газ гъанва, анра бугъадалди чимивал гудай къурулуш кардик кутуна кIанзава.
Ичинрин школа кирида кьунвай дараматда ава, ана кIарасралди цIай хъувуна чимивал твазва.
Агъа Хъартасрин ва Вини Хъартасрин школайри документар гьазурнава, газдин къурулушдихъ галкIурдай ихтияр къачунва. Гила кIамайди и кар кьилиз акъудун я. КIахцугърин СОШ-диз газдин пич ва счетчик къачунва, амма хуьруьн газопроводдиз газ ахъайдалди, и къурулушдихъ галкIурдай ихтияр ганвай документар кьабулзавач. Алай вахтунда чимивал гудай къурулушдин насос кIвалахдай къайдада авач.
Зизикрин мектебда чимивал гудай къазан ремонт авунин лазимвал ава, Алкьвадрал 2 котелдикай сад къайдада авач, идан гьакъиндай къуллугъзавай тешкилат хабардарнава.
ЦIийи Макьарин ва Вини СтIалрин аялрин бахчайра газдин котелар дараматрин къенепата ава, абур къецел акъудун патал цIийи дараматар эцигун лазим я. НуьцIуьгърин аялрин бахчадин котел гъили туькIуьрнавайди я. КIварчагърин аялрин бахчадани газдин котелдин тадаракар ремонт хъувуна кIанзава.
Муниципалитетдин культурадин идарайрани зулунни хъуьтIуьн сезондин вахтунда объектри ара атIунар авачиз кIвалахун патал тайин серенжемар кьабулзава. Абурун план туькIуьрнава. Объектар зулунни хъуьтIуьн сезондиз гьазурунин кIвалахрал “ЖКХ ва аваданламишун” МКУ-ди ва райондин комиссияди гуьзчивал тухузва.
Райондин культурадин хиле 5 идара ава, гьа жергедай тир И.Гь.Тагьирован тIварунихъ галай ЦТКНР-дихъ чкайрал — 35, ЦБС-дихъ 27 филиал ава. Хуьрерин клубрин 19 дараматда газ ава, амай чкайра пичера цIай хъийизва.
Библиотекайрикай 17-да газ ава, 7-да пичера цIай хъийизва, 4 библиотека кьилдин ксарин кIвалера ава. Газ тухванвай вири идараяр цIай хъийидай сезондиз гьазур я, амма пул тагун себеб яз, бязи идарайрин газ атIанва. Культурадин имаратда, аялрин музыкальный ва художественный школайрани профилактикадин кIвалахар тухванва, чимивал гудай къурулушар къайдада ава.
Хуьрерин 11 библиотекада кIарасар кудай пичер эцигнава. Анриз кIарасар хкун патал тамарин майишатдихъ галаз икьрарар кутIунун ва пул гун лазим я. И месэла вахтунда гьялайтIа, цIаяр хъийидай сезондалди гьазурвилин вири кIвалахар акьалтI жеда.
“Сулейман-Стальский ЦРБ” ГБУ-дани сагъламвилин идарайра зулунни хъуьтIуьн сезондиз акъвазунар авачиз ва санитариядинни чимивилин къайда хуьналди кIвалах авун патал са жерге серенжемар кьиле тухванва. Серенжемрин пландин бинедаллаз хъувуна кIанзавай кIвалахар 15-августдилай 25-сентябрдалди тамамарна куьтягьда.
Медицинадин 8 идарада (ФП-ра ва ФАП-ра) хъуьтIуьн вахтунда пичера кIарасар кузва. Анриз газ гъанвач. Анагар 1-октябрдалди кудай шейиналди таъминарда. ДаркIуш-Къазмайрин амбулаториядин чимивилин къурулушди санитариядинни гигиенадин истемишунриз жаваб гузвач, ана чимивал гудай система патал кьилдин чка дуьзмишун лазим я.
2022-2023-йисарин зулунни хъуьтIуьн сезондиз гьазурвилер акунин сергьятра аваз райондин хуьрера агьалийрин кIвалер, образованидин, культурадин ва яшайишдин маса объектар чимивилелди, целди, электричестводалди ва газдалди таъминарун патал тайин кIвалах тухванва. Кьилди къачуртIа, хуьрера 790 метрдин мензилдиз цин цIийи линияр тухванва, Алкьвадрин, Кьасумхуьруьн, Герейханован хуьруьн, ЦIийи Макьарин, КIварчагърин, Уллу-Гъетягърин, Цмуррин, Вини СтIалрин ва Хпуькърин, Агъа СтIалрин хуьрера чIуру гьалда авай 2550 метрдин цин линияр дегишарна, ремонт хъувуна.
Зулунни хъуьтIуьн сезондиз гьазурвилер акунин сергьятра аваз 32-нумрадин ДЭП-ди чIуру гьалда авай рекьерин къир цанвай участокра (санлай 3600 кв.м.) фурар акъатнавай чкаяр ремонт хъувуна, хирхем вегьенвай 17 км рехъ къайдадиз хкана, муркIар цIурурдай 2 тонн технический кьел ва герек маса шейэр, 5 улакь-техника гьазурнава.
2022-2023-йисарин зулунни хъуьтIуьн сезондиз гьазурвилер акунин жигьетдай тухузвай кIвалахар районда тешкилнавай штабдин ва райондин кьил Саид Темирханован кьетIен гуьзчивилик ква.
Хазран Кьасумов
