Махачкъаладин гьуьлуьн алишверишдин портуни гимийра аваз къецепатан уьлквейриз гъуьр рекье тваз башламишдайвал я, хабар гузва ТАСС-ди, портунин гендиректордин везифаяр вахтуналди тамамарзавай Рустам Керимован гафарал асаслу яз. Гъуьруьз исятда къецепатан уьлквейри екез итиж ийизва.
“Асул гьисабдай ам, Ирандин мулкунилай яна, Иракдиз ва Мукьвал тир РагъэкъечIдай патан маса уьлквейриз тухузва. Чун патал им цIийи суьрсет я. Икьван чIавалди чна портуна гимийриз гъуьр ягъайди туш. Гимидаваз тухудай гъуьруьн сад лагьай кьадар тахминан 2,2 агъзур тонндиз барабар жеда.Идалай кьулухъ, эгер чавай и технологиядин гьерекат кардик кутаз хьайитIа, гимийра аваз 3-5 агъзур тонн гъуьр санлай рекье тваз жеда”, — къейдна Р.Керимова. Адан гафаралди, портунай рекье твадай парцин кьадар вацра 15-30 тонндив агакьардай фикир ава.
2022-йисан 6 вацра Махачкъаладин алишверишдин портуни 200 агъзур тонндив агакьна цемент, техил, кьел ва маса парар санай масаниз рекье туна. Алатай йисан гьа и вахтунив гекъигайла, рекье твазвай кьуру парарин кьадар 93 процентдин гзаф хьанва.
«Лезги газет»
