28 йисалай
Гергебил районда полициядин векилри 28 йис идалай вилик хьайи тахсиркарвилин “кьилин игит” тайинарна. Идакай РД-дин МВД-дин пресс-къуллугъди хабар гузва.
1994-йисан октябрдин вацра Авар Къойсу вацIай вичел хирер-кьацIар хьанвай мейит жагъана. А чIавуз и тахсиркарвал авурди вуж ятIа тайинариз хьаначир.
Икьван йисар арадай фейила, къанун-къайда хуьдай органрин векилри куьгьне уголовный дело мад тупIалай авуна ва нетижада тахсиркардин гел жагъана: Ипута хуьруьн 57 йис хьанвай агьали.
Полициядин отделда масадан чандиз къаст авунай шак физвайда хиве кьурвал, 28 йис идалай вилик адан дустунин кIваляй багьа шейэр квахьна. Шак къуншидал фена. Абуру шак физвайдаз и кардай кьил акъудун патал архайин чкада акун меслятна. Физвай рекье къуншиди гьакъикъатдани вичи чуьнуьхайдакай хабар гана ва вири затIар элкъвена вахкун хиве кьуна. Амма чуьнуьхнавай затIар гьина эцигнаватIа, ада лагьанач.
ВацIуз мукьва чкадиз эвичIайла, итимри, белки, хиве кьадатIа лагьана, къунши гатана. “Зи гъуд галукьайла, ам ярх хьана ва мад юзун хъувунач. Кьенвайди чир хьайила, за ам вацIуз гадарна”, — сир ачухна тахсиркарди.
РФ-дин 1994-йисан УК-дин 103-статьядал асаслу яз, уголовный дело къарагъарнава.
Мукъаят хьухь!
Эхиримжи йисара Дагъустанда рекьера жезвай аварийрин нетижада телеф жезвайбурун кьадар гзаф хьанва. Улакьрин гьерекатдал гуьзчивалдай камераяр эцигнаватIани, къайдаяр чIурунай жермеяр ийизватIани, аварийрин вилик пад кьаз жезвач.
Мисал яз, 25-июлдиз Махачкъаладин са куьчеда “Toyota Land Cruiser 200” маркадин машин мотоциклда акьуна ва эхиримжиди рекьин къерехда акъвазарнавай “Газелда” ахкьуна. Нетижада мотоцикл гьалзавайди хьайи хирерикди духтурханада телеф хьана.
Гьа и юкъуз Дербент районда “ВАЗ-21043” маркадин машин ам гьалзавайда рекьин гьерекатдин къайдайрал амал тавурвиляй “Камазда” акьуна. Жуьреба-жуьре хирер-кьацIар алаз къайдаяр чIурайди духтурханадиз агакьарна. Амма адаз куьмекиз хьанач.
27-июлдиз Махачкъалада 17 йис хьанвай жегьилди гьалзавай мотоцикл рекьин къарши гьерекат авай патаз экъечIунин нетижада “ВАЗ-2115” маркадин машинда акьуна. Жегьилди гьа чкадал чан гана.
Гьуьрметлу улакьрин рулдихъ ацукьзавайбур! Рекьерин гьерекатдин къайдайрал амал ая. Куьн кIвалера байгърийри вилив хуьзвайди рикIелай алудмир!
«Лезги газет»
