“Виридалайни хъсан кIвал. Виридалайни хъсан гьаят” конкурсдин гъалибчийривай РД-дин эцигунрин, архитектурадин ва ЖКХ-дин министерстводин патай гьевеслу ийидай пишкешдик умуд ку­таз жеда. Конкурсда неинки идара ийидай компанийривай, гьакIни  гзаф квартирайрикай ибарат кIвалера (МКД) яшамиш жезвай ксаривай ва  инициативный дестейривай иштиракиз жеда.

Июлдин  юкьвара РД-дин эцигунрин, архитектурадин ва ЖКХ-дин  министерст­вода Да­гъустан Республикади гзаф квартирайрикай ибарат кIвалер идара авунин виридалайни хъсан тежрибайриз талукь тир “Виридалайни хъсан кIвал. Ви­ри­да­лайни хъсан гьаят” конкурс­да  иштиракунин месэла веревирднай. Конкурс “Сад тир Россия” партиядин “МКД-дин агьа­лияр” проектдин сергьятра аваз кьиле ту­хузва.

2-августдиз “Дагъустан” РИА-дин май­дан­дал гзаф квартирайрикай ибарат кIвалер идара авунин виридалайни хъсан тежрибайриз талукь “Виридалайни хъсан кIвал. Виридалайни хъсан гьаят” конкурс республикадин мулкунал кьилиз­ акъудзавай тегьердиз талукьарнавай пресс-конференция хьана.

Республикадин СМИ-рин векилрихъ галаз гуьруьшда “Сад тир Россия”  пар­тия­дин “МКД-дин агьалияр” проектдин регионда авай  координатор Хиби Алиева, РД-да Госжилинспекция­дин регьбер Сергей Касьянова,  “Чи кIвал. Чи гьаят” подпроект уьмуьрдиз кечирмишунал гуьз­чи­вал­завай Ибрагьим Исаева иштиракна.

Хиби Алиеван гафаралди, проект и мукьвара­ гъиле кьунвайди ятIани, партиядиз адахъ еке мум­кинвилер аваз аквазва. Ада къейд авурвал, и конкурс сифтени-сифте  гзаф квартирайрикай иба­рат кIва­лер идара ийизвай компанийрин  кIва­лахдин ерилувал артухарунихъ, кIва­ле­рин агьа­лийрин, идара ийидай компанийрин ва гьукумдин органрин арада нетижалу  алакъаяр тайинарунихъ, МКД-яр идара авунин рекье виридалай­ни хъсан тежриба раиж авунихъ элкъуьрнава.­

“Конкурс кьиле тухудайла, чна асул фикир не­­инки идара ийидай компанийри, гьакI МКД-дин агьа­лийри ва ремонтрин кIва­лахрани, чпин подъездра къулай шар­тIар тешкилунин кардани­­ ак­тивнидаказ иштиракзавай агьалийрин­ дес­­­­тей­ри иштиракуниз гузва”, — лагьана Х.Алие­ва.­

Конкурс пуд паюникай ибарат жеда. Сад лагьай пай — арзаяр кьабулун — 2022-йисан 15-августдалди давам жеда. Кьвед лагьай паюна агакьарнавай документар ахтармишда. Пуд лагьай паю­на нетижаяр кьада  ва гъалибчияр хкяда.

Малум хьайивал, конкурсда  6 терефдай гъалибчияр хкяда: “МКД-дин Советдин ви­ридалайни хъсан тежриба”, “ТСЖ/ЖСК-дин кIва­лахдин виридалайни хъсан тежриба”, ­“Ви­ридалайни хъсандиз дуст­вилин алакъаяр хуьз­вай кIвал”, “Капитальный ремонт авунин виридалайни хъсан тежриба”, “Виридалайни хъсан подъезд”, “Виридалайни хъсан гьаят”.  Идара ийидай са компаниядиз  конкурсда иштиракун патал анжах са арза рекье твадай ихтияр ава.

“Къенин юкъуз РД-дай Госжилинспекциядиз  цIийи команда атунихъ галаз санал чна  вилик са жерге важиблу месэлаяр эцигнава. Абурук  МКД-дин агьалияр  кIвалер идара авунин кардал жезмай кьван  гзаф желб авун ва абуру кIвалин  месэлаяр гьялунин карда  активнидаказ иштиракун, гьакIни ЖКХ-дин гьакъи гунин кар ва УК-дин кIвалах асантарзавай  алай аямдин цIийи технологияр, “ГИС ЖКХ” хьтин са жерге маса системаяр кардик кутун акатзава. Партияди тешкилнавай  и проектди вилик эцигнавай макьсадар ГЖИ-дин месэлайрихъ галаз ала­къа­лубур я”, — къейдна С.Касьянова.

Адан гафаралди, вирироссиядин “Виридалайни хъсан кIвал. Виридалайни хъсан гьаят” конкурсда иштиракунин гьакъиндай гьикьван гзаф тешкилатрин, комитетрин, МКД-дин советрин патай  арзаяр атайтIа, федеральный субсидия къачун ва конкурсда иштиракун давамарун патал гьакьван гзаф мумкинвилер ачух жезва.

“Гъавурда гьатун патал: алай вахтунда  зур­ба ва гзаф важиблу  проект уьмуьр­диз ке­чир­мишиз башламишзава, чун исятда адан  чешмедив гва.  Ада активни­даказ иштиракуни гележегда чаз кьилди къачур хсуси порталдай  чи тежрибада жезвай четин месэлайрикай хабар гудай, яшайишдин законодательствода дегишвилер тун теклифдай (абуруз ачухдаказ сесер гуз жедайвал) ва идалди месэла гьар жуьре регионар ва кIвалер патал ва­жиблуди тирдакай малумардай мумкинвал гуда”, — алава хъувуна проектдин координаторди.

Жасмина Саидова