2-августдиз РД-дин Гьукуматдин Председатель Абдулмуслим Абдулмуслимов “РЖД” ОАО-дин генеральный директордин заместитель Николай Федосеевахъ галаз гуьруьшмиш хьана. Абур ракьун рекьера поездрин гьерекат тешкилунин, ракьун рекьер цIийикIа туькIуьр хъувунин, хатасузвал хуьнин, ракьун рекьин вокзалрин гьал хъсанарунин месэлайрикай рахана.

Гуьруьшдин вахтунда Махачкъала-Дербент поездди тухузвай агьалийрин кьадар гзафарунин гьакъиндайни месэла веревирдна. Къейд авурвал, 8-августдилай Махачкъаладай патарив гвай шегьерриз физвай поездрин кьадар артухарда. Поезддихъ галай 4 вагондин чкадал 6 вагон акалда.

Абдулмуслим Абдулмуслимова  Махачкъаладай патарив гвай шегьерриз электропоездар ачухунин месэлани кудна. Махачкъаладин аэропортунай Дербент шегьердиз электричка ахъаюнин игьтияж авайдакайни лагьана­.

Н.Федосеева Дагъустанда ракьун рекьерай неинки парар дашмишун, гьакI къенепатан туризм вилик тухун патал пассажиррин кьадарни гзафардай серенжемар кьабулдайди хиве кьуна.

«Лезги газет»