Алай вахтунда Дагъустанда яшайишдин кIвалералди таъминар тавунвай Ватандин ЧIехи дяведин са иштиракчини амач
РД-дин зегьметдин ва яшайишдин рекьяй вилик финин министерстводин пресс-къуллугъди хабар гузвайвал, алай йисуз яшайишдин рекьяй жуьреба-жуьре кьезилвилер авай (льготники) ксариз яшайишдин шартIар хъсанарун патал 363 шагьадатнама ганва.
“Лезги газетдив” агакьнавай делилралди, шагьадатнамаяр къачунвайбурун арада дяведин гьерекатрин ветеранар, дяведин гьерекатра телеф хьайибурун хизанар, афгъанвияр, набут аялар чIехи жезвай хизанар ава.
Яшайишдин шартIар хъсанарун патал, мисал яз, Афгъанистанда кьиле фейи вакъиайрин иштиракчийриз ганвай гьар са сертификатдин кьадар 1 миллионни 68 агъзур манатдиз барабар я. Набутриз ва набут аялар чIехи жезвай хизанриз ганвай сертификатрин кьадарди 840-870 агъзур манат тешкилзава. 1 миллионни 681 агъзур манатдин кьадарда авай кьве сертификат Ватандин ЧIехи дяведин кьве иштиракчидин хендедайриз чара авуна.
РД-дин зегьметдин ва яшайишдин рекьяй вилик финин министерстводин пресс-къуллугъдин векилди алава хъувурвал, алай вахтунда Дагъустанда яшайишдин кIвалералди таъминар тавунвай Ватандин ЧIехи дяведин са иштиракчини амач. Афгъанвийризни яшайишдин кIвалер маса къачудай мумкинвилер тешкилунин жигьетдай кьиле тухузвай кIвалахни йисалай-суз вилик физва. Мисал яз, 2019-йисуз кIвалер маса къачудай сертификат гайи афгъанвийрин кьадар 65 тиртIа, 2020-йисуз 83-дав агакьна. 2021-йисуз и рекъем 104-дан гзаф хьана. ЦIи афгъанвияр патал бюджетдин гьисабдай 309 миллион манат пул ахъайдайвал я.
Чи мухбир
