Мегьарамдхуьруьн райондин пресс-къуллугъди хабар гузвайвал, алатай гьафтеда Приморскда кардик квай “Самур” лагерда 2006-2007, 2008-2010, 2011-2012, 2013-2014-йисара дидедиз хьайи жаванрин арада азаддаказ кьуршахар кьунай райондин ачух турнир кьиле фена. Райондин спортдин ва физический культурадин отделди тешкилнавай и серенжем Дагъустандин Конституциядин Йикъаз талукьарнавай.
Малум хьайивал, мярекатда Махачкъаладай тир багьа мугьманрини иштиракна. Кьилди къачуртIа, абурун арада РД-дин спортдин ва физический культурадин (ФК) министерстводин ФК-дин, спортдин ва резерв гьазурдай Управленидин начальник Халитбег Махачев ва А.Алиеван тIварунихъ галай ССШОР-дин директор Мегьамед Исагьажиев авай.
Мугьманри ва турнирдин иштиракчийри къейд авурвал, хъсан гьазурвал ва тешкиллувал аваз кьиле тухвай спортдин серенжемдин макьсад районда азаддаказ кьуршахар кьун машгьур авун ва вилик тухун, спортсменрин устадвал хкажун ва республикадин дережадин акъажунра иштиракун патал бажарагълу спортсменар хкягъун тир.
Ачух турнирда гъалиб хьайи ва приздин чкаяр кьур спортсменриз талукь тир дережайрин грамотаяр, дипломар ва къиметлу пишкешар гана.
Чи мухбир
