РД-дин Гьукуматди 2022-йисуз муькъвер ва шегьре рекьер ремонт авуниз ва кутугай гьалда аваз хуьниз 11 миллиард манат чара авун фикирда кьунва, хабар гузва ТАСС агентстводи.
Дагъустандин транспортдин ва рекьерин майишатдин министр Жамбулат Салавован гафаралди, 2022-йисуз госпрограммадин умуми бюджет 11,1 миллиард манатдиз барабар я. Абурукай 1,2 миллиард манатди федеральный бюджетдин такьатар тешкилзава.
“Пландик кутунвай такьатрин гьисабдай и йисуз гьакIни цIийикIа туькIуьр хъувунвай 52,8 километр ва ремонтнавай 308 километр рекьер ишлемишиз вахкун, 7,589 агъзур километр рекьерихъ гелкъуьн таъминарда. Идалайни гъейри, муниципальный дережадин 193,3 километр рекьер ремонтда”, — къейдна идарадин руководителди.
“Хатасуз ва ерилу рекьер” милли проектдин сергьятра аваз Махачкъаладин санлай къачурла 21 километр рекьер — ремонт ва региондин 49 километр рекьер цIийикIа туькIуьр хъийида.
Амина Муслимова
