Махачкъаладин аэропортуни пассажирар патал цIийи терминалдин проектдиз 2,5 миллиард манат серфда. Махачкъаладин международный аэропортунин къенепатан авиалинийрин пассажирар патал цIийи терминал эцигунин проект 2023-йисуз уьмуьрдиз кечирмишиз башламишда. Идакай и мукьвара аэропортунин генеральный директор Саид Рамазанова хабар гана.
“Терминалдин проект гьазурзава, алай йисуз и кар кьилиз акъудна куьтягьда, эцигунрин кIвалахар 2023-2025-йисара тамамарда. 2023-йисуз чун куьгьне дарамат чукIурун патал вахтуналди тир терминал эцигунив эгечIда. Идалай кьулухъ къенепатан цIийи терминал эцигунин кIвалахар гегьенш майданра башламишда. Международный терминал (ам 2021-йисан августдиз ачухнай) чаз 1,6 миллиард манатдай акъвазна. Къенепатандан харжияр 2,4-2,5 миллиард манатдиз барабар ва вахтуналди тир терминалдин къимет 500-800 миллион манат хьун лазим я”, — лагьана С.Рамазанова.
Ада гъавурда турвал, терминалдин эцигунар аэропортунин хсуси такьатрихъ кьилиз акъудда. Гьа са вахтунда аэропортунин инженервилин ва транспортдин къурулушар цIийи хъувун республикадин гьукумди вичин хивез къачуна.
Малум хьайивал, канализациядин насосрин цIийи станция, чиркин ятар михьи хъийидай тадаракар эцигун, виниз тир гужлувилин кабелдин линияр цIийибуралди эвезун, гьакIни рекьер алай аямдин истемишунриз жаваб гудайвал ва пулсуздаказ машинар акъвазариз жедай чка туькIуьрун пландик кутунва. Региондин Гьукуматди и рекьериз харж авун патал 600 миллион манат фикирда кьунва.
Махачкъаладин международный “Уйташ” аэропорт Дагъустан Республикадин транспортдин къурулушдин йигин еришралди виликди физвай объект я. 2021-йисан августдиз аэропортуна йиса тахминан 300 агъзур кас (куьгьне терминалдив гекъигайла, пуд сеферда артух) кьабулдай мумкинвал авай международный терминал ачухнай. Санлай къачурла, 2021-йисуз аэропортуни къуллугъ авур пассажиррин кьадар 2 миллиондилай алатна. Им 2020-йисан кьадардилай 1,4 сеферда гзаф делил я. 2022-йисан 6 вацран вахтунда аэропортуни кьабулай пассажиррин кьадар 1 миллиондилай артух хьана. Им алатай йисан гьа и вахтунив гекъигайла, 14,5 процентдин гзаф я.
Алай йисан июндиз Махачкъаладин аэропортуни вичин тарихда садрани тахьай кьадар пассажирриз — 255 768 касдиз — къуллугъна.
Виридалайни машгьурбурун арада Москвадиз, Санкт-Петербургдиз ва Сургутдиз, гьакIни къецепатан уьлкве — Дубайдиз тир рейсар ава.
Къейдзавайвал, “Уйташ” аэропортуни къуллугъзавай пассажиррин кьадар гзаф хьуниз Украинадин мулкунал кьиле физвай военный серенжемрини таъсирна — абур себеб яз, Россиядин кьиблединни рагъакIидай патан 11 аэропортуни сергьятвилер аваз кIвалахиз им 5 варз я.
Идалайни гъейри, Махачкъаладин аэропортунин международный рейсерин географияни гегьеншарзава. ИкI, июлдилай — Алматадиз, йисан эхирдалди Тель-Авивдиз дуьз рейсер кардик кутада. Уьлкведин къенепатан рекьерикай рахайтIа, июндиз “Уйташдай” Уфадиз сад лагьай рейс тамамарна. ЦIийи рекьерик Сочи, Нальчик шегьерарни ква. Санлай къачурла, Махачкъаладин аэропортунай Россиядин 9 шегьердиз ва международный 9 рекьиз рейсер тамамарзава.
«Лезги газет»
