Гад хуьруьн майишатдин карханаяр, лежбервилинни фермервилин майишатар, арендаторар, хуьрерин зегьметчияр патал кIва­лахрин къизгъин вахт я. Уьзуьмлухрани багълара, производстводин хилера агротехникадин серенжемар кьиле тухунихъ галаз санал абурун вилик агакьнавай бегьер кIватI хъувунин жавабдар везифани акъвазнава. Алай вахтунда СтIал Сулейманан районда техилар, емишар, салан ва бустандин няметар кIватI хъийизва.

Райондин кьил Саид Темирханов алатай гьафтеда райондин са шумуд карханада ва арендаторрин участокра хьана. Ада анра техилар ва маса няметар кIватI хъувунин кIвалахар кьиле физвай гьал ахтармишна.

Адахъ сад лагьай заместитель  Ла­цис­ Оружев, хуьруьн майи­шатдин ва суьрсетдин управленидин начальник Къазимегьамед Къазимегьамедов, гьакI­ни журналистар галай.

Къецепатай къадагъаяр эцигнавай алай вахтунда чил менфятлувилелди иш­лемишзавай, дурумлу экономика ара­дал гъун патал кIвалахзавай хуьрерик Курхуьр  акатзава.

Анин кьилихъ ва кIанихъ галай, хейлин йисара чIурухъан чкаяр яз амукьай Паласа ва Дугун участокра шуьмягъин багълар кутуни ва техилар цуни райондин гьакимрин гуьгьуьлар шадарна.

Райондин кьил сифте арендатор Замир Шайдаеван никIиз фена. Къизилдин ранг алай никIе къуьлуьн тарифдин бегьер авайди гьасятда виле акьазва.

Арендатордихъ 12  гектар къуьлуьн никIер ава. Анра гад агудунал са комбайн ва техил дашмиш хъувунал “ГАЗ-53” маркадин машин машгъул тир. Пресс-подборщик галай тракторди самар туьквера кьазвай. Замир Шайдаева райондин гьакимриз лагьайвал, никIерай 50 тонндилай тIимил тушиз техил кIватI хъувун планламишнава.

Саид Темирханов Паласа участокда авай арендаторрин никIеризни фена. ИкI, тежрибалу арендаторар тир Нарим Саругъланова ва Сефербег Шайдаева 36 гектарда техилар гьасилнава. Анра гад агудунал са комбайн машгъул тир. Бегьер писди туш.

Арендаторри райондин кьилиз ва адахъ галай жавабдар къуллугъчийриз лагьайвал, къуьлуьн  гьар са килограмм 14 манатдай маса гузва, муьштериярни ава. Амма арендаторрик-магьсулдаррик секинсузвал кутазвай месэлани ава. Амни самун алафриз муьштерияр тахьун я. Арендаторар тир Замир ва  Сефербег Шайдаеври,  Нарим Саругъланова лагьайвал, алатай йисара абурувай самун алаф асул гьисабдай Хив, Агъул ва Кьурагь районрин малдарвилин карханайри, агьалийри маса къачузвайди тир. ЦIинин йисуз абуруз самар кIанзавач, вучиз лагьай­тIа, анра цIи векьер бул я.

— Самар ужуз къиметдай кьванни къачудайбур хьанайтIа, чаз  гад агудай механизаторриз-комбайнерриз гудай пул кьванни же­дай, — лугьузва Сефербег Шайдаева. Райондин гьакимри аренда­торриз самар маса гунин патахъай са рехъ жагъурун хиве кьуна.

Санлай къачурла, районда 1023 гектардай гад кIватI хъийизва. Алай вахтун­да и кIвалахар эхиримжи гектарра кьиле тухузва. Юкьван гьисабдалди гектардин бегьерлувили 25-26 центнер тешкилзава. НикIерай 400 тонндив агакьна самарни кIватIнава.

Райондин хуьруьн майишатдин карханайра, КФХ-ра, арендадин участокра емишар (670,5  гектардай), къарпузарни гатун халияр (105 гектардай), майваяр (938 гектардай), картуфар (282 гектардай) кIватI хъувунни давам жезва.

Саид Темирханов ва адахъ галай  къуллугъчияр районда гад агудзавай ва бегьерар кIватI хъийизвай гьалдилай рази яз ­амукьна.

Хазран Кьасумов