Алатай гьафтеда Махачкъалада улакьрин ОМОН арадал атана 26 йис тамам хьун шад гьалара къейдна. Идакай “Лезги газетдиз” РФ-дин Дагъустан Республикада авай милли гвардиядин федеральный къуллугъдин Управленидин пресс-къуллугъди хабар гана. Шад мярекатда территориальный органдин начальникдин заместителдин везифаяр вахтуналди тамамарзавай полициядин полковник Арсен Абдуллагьова, къуллугъдин ветеран — 1998-йисалай 2013-йисалди отряддин командир, полициядин отставкада авай полковник Мегьамедгьажи Байсултанова, махсус подразделенидин къуллугъчийри иштиракна.
Улакьрин ОМОН-дин командир, полициядин полковник Иса Мегьамедова отряд арадал атуникай ва ам фейи рекьикай куьрелди суьгьбетна.
— Къенин юкъуз отрядди чи республикадин ва санлай уьлкведин хатасузвал таъминарунин везифаяр кьилиз акъудун давамарзава. Подразделенида къуллугъзавайбуру неинки махсус серенжемра иштиракзава, гьакI ракьун рекьин, гьавадин ва целай физвай улакьра тахсиркарвилерин вилик пад кьазва. Чун инлай кьулухъни везифаяр намуслудаказ кьилиз акъудиз гьазур я, — лагьана ада.
Территориальный Управленидин кьиле авай ксарин тIварунихъай омоновчияр полициядин полковник Арсен Абдуллагьова тебрикна. Амай вири подразделенийрин арада абуру лайихлу чка кьазвайди, ватандашрин уьмуьр ва сагъламвал хуьн патал, чпин чанарилайни гъил къачуна, гьар юкъуз тахсиркарвилерихъ галаз женг чIугвазвайди къейдна. Къуллугъ кьиле тухузвай гьалдай, женгинин стхавилин баркаллу адетар хуьнай сагърай лагьана. Чими келимаяр ада ветеранрин тIварцIихъни лагьана. Чпин къуллугъдин ва уьмуьрдин девлетлу тежрибадалди абуру жегьилриз тербия гуз куьмекзавайди къейдна.
Тебрикдин гафар отряддин ветеран Мегьамедгьажи Байсултановани лагьана. Ада вичин кIвалахдин юлдашриз кьинез вафалу ва Ватан хуьдай мягькем къалхан хьуниз эвер гана.
Гуьгъуьнлай кIватI хьанвайбуру, кIвалахдин везифаяр кьилиз акъуддайла, телеф хьайи къуллугъчийриз хкажнавай мемориалдал цуьквер эцигна ва, са декьикьада кисна акъвазуналди, абурун экуь къаматар рикIел хкана.
Мярекат, отрядда къуллугъ кьилиз акъуддайла, тафаватлу хьайибурув ведомстводин шабагьар ва къиметлу пишкешар вахкуналди акьалтIна.
Регина Семедова
