Дагъустан Республикади, гегьенш майданра уьмуьрдиз кечирмишзавай федеральный программадин сергьятра аваз, 100-далай гзаф мектебра капитальный ремонт авунин гьакъиндай РФ-дин просвещенидин министерстводиз арза гьазурнава. Идакай и йикъара, Махачкъаладин яшайишдин объектар ахтармишдайла, РД-дин Гьукуматдин Председатель Абдулмуслим Абдулмуслимова хабар гана.
Алай вахтунда 2023-2024-йисара мектебар ремонт авуниз талукь арза гьазурнава, Дагъустанди 2023-йисуз образованидин 109 идара ремонт авун пландик кутунва. Идахъ галаз сад хьиз, РД-дин Гьукуматди регионди мад 135 школада капремонт авун патал арза гьазурунин гьакъиндай месэла къарагъарна. “Мукьвал тир вахтунда чна вири арзайрин тереф федеральный центрада хуьн пландик кутунва. Умудлу я хьи, 2024-йисузни чавай 135 мектеб ремонт ийиз жеда. Им акьалтIай важиблу месэла я, гьикI хьи, къенин юкъуз гзаф школайри образованидин стандартриз жаваб гузвач”, — лагьана РД-дин премьер-министрди.
А.Абдулмуслимова къейд авурвал, РД-дин Кьил Сергей Меликова республикадин Гьукуматдин вилик регионда мектебар авай гьал бинедилай дегишарунин ва пуд сменадин къайда арадай акъудунин месэла эцигнава.
“И месэла гьялун патал чна кьве рехъ хкянава: я чна бинедилай цIийи мектебар эцигда, я мумкин тир чкайра капремонтдин программадин сергьятра аваз ремонтдин кIвалахар тамамарда”, — лагьана А.Абдулмуслимова.
Алай йисуз Дагъустандин 210 мектебда ремонтдин кIвалахар кьиле физва. Абурукай 19 школа Махачкъалада ава.
“Сифтедай, кIвалахдив эгечIай вахтунда, и карда бязи нукьсанар авай. Ахпа гьар са мектеб гуьзчивилик кутуна. Гьар са школадин гьакъиндай жавабдарвал Дагъустан Республикадин Гьукуматдин, Халкьдин Собранидин патай кьилдин векилрин хиве ава. Абур гьар са школа ремонт авунин карда кураторар я. 25-августдалди мектебар ремонт авуниз талукь вири кIвалахар акьалтIарун ва 1-сентябрдиз аялар цIийи хъувунвай, кутугай гьалда авай школайриз фин лазим я”, — алава хъувуна А.Абдулмуслимова.
Амина Муслимова
