Мегьарамдхуьруьн райондин Къуйсунрин хуьре воркаутдин цIийи майдан кардик кутунва. “Лезги газетдиз” муниципалитетдин администрациядин пресс-къуллугъди хабар гайивал, ам милли “Демография” проектдин “Спорт — уьмуьрдин къайда” программадин куьмекдалди эцигнава. Къейд ийин хьи, программадин асул макьсад Урусатдин жуьреба-жуьре регионра спортдал машгъул жезвай агьалийрин кьадар артухарунихъ галаз алакъалу я.
ЦIийи майдан Къуйсунрин хуьревай стадиондин мулкарал эцигнава. Объектдин къимет 2 миллионни 200 агъзур манатдиз барабар я. Лагьана кIанда, майдан арадал гъидайла, 260 агъзур манатдин кьадарда аваз инвестордин такьатарни желбнава.
Райондин администрациядин пресс-къуллугъдин малуматралди, муниципалитетди спорт вилик тухуниз кьетIен фикир гузва. Мисал яз, чкадин хуьрера саки гьар йисуз воркаутдин майданар пайда жезва. И делилди спортдал машгъул жезвайбурун кьадар артух хьуниз таъсирзава.
«Лезги газет»
