Мукьвара Кьурагьрин хуьре мини-футболдай дуствилин “Санал” тIвар ганвай кубок патал акъажунар кьиле фена. Мярекат Кьурагь райондин администрациядин физический культурадин, спортдин ва жегьилрин крарин рекьяй отделди Хпежрин хуьряй тир карчи Альберт Вагьидовахъ галаз санал тешкилнавай.
“Лезги газетдиз” муниципалитетдин администрациядин пресс-къуллугъди хабар гайивал, 5-сеферда кьиле тухвай и турнирда цIи Кьурагь райондин жуьреба-жуьре хуьрерин санлай къачурла, 15 командади иштиракна. Судьяйрин къарардалди, абур кьуд дестедиз пайнавай. Пуд юкъуз давам хьайи акъажунра судьядин везифаяр СтIал Сулейманан райондай тир Ролан Рамазанова тамамарна.
Нетижада 1-чкадиз — “Лекьер”, 2-чкадиз — “Махачкъала” ва 3-чкадиз “Арт Колор” командаяр лайихлу хьана. Абуруз кубокар, медалар, грамотаяр, пулдин ва маса пишкешар гана. Турнирда тафаватлу хьайи кьилдин спортсменрин алакьунарни пулдин пишкешар гуналди къейдна. Абурун арада Назир Фейзуллаев, Хидирнеби Хидирнебиев, Марат Рамазанов, Ислам Мамедов, Гьажимурад Рамазанов, Замир Гьажиев ава.
Турнирдин гъалибчияр тебрикзавай мярекатдал акъажунрин кьилин спонсор Альберт Вагьидоваз Кьурагь райондин администрациядин патай Разивилин чар гана ва районда спорт вилик тухунин кардик чIехи пай кутунай сагърай лагьана.
Агьмед Магьмудов
