Ичкидин таъсирдик кваз
14-июлдиз Буйнакск шегьердин полициядиз чкадин агьалиди вичин машин чуьнуьхнавайдакай хабар гана. Адан гафарай малум хьайивал, шегьердин са куьчеда машин акъвазарна, ам вичиз герек затIар маса къачуз туьквендиз фена. Элкъвена хтайла, адаз вичин улакь гьат хъувунач.
Къанун-къайда хуьдай органрин векилри тади гьалда кьабулай серенжемрин нетижада квахьнавай машин республикадин меркезда Йирчи Къазакьанни Ярагъ Мегьамедан тIварарихъ галай куьчейрин къекъуьндилай жагъана. Адан къене Буйнакскдин 28 ва 29 йисар хьанвай агьалияр авай.
Полициядин отделда абуру хабар гайивал, куьчедал худ квай ва ракIарарни ахъа машин акурла, ичкидин таъсирдик квай жегьилар чарадан машин гьалдай фикирдал атана.
Полициядин векилри тайинарайвал, абур виликдайни гьа ихьтин тахсиркарвал авунай жавабдарвилиз чIугунай. Чуьнуьхнавай машин иесидив вахкана. Тахсиркаррин гьакъиндай лагьайтIа, къанун-къайда хуьдай органри ахтармишунар кьиле тухузва.
Анаша жагъана
12-июлдиз Дербент шегьердин Къази-Мегьамед Агъасиеван тIварунихъ галай проспектда республикадин къанун-къайда хуьдай органрин векилри ахтармишун патал са машин акъвазарна. Нетижада анай 152 граммдин кьадарда аваз анаша жагъана.
РД-дин МВД-дин пресс-къуллугъди хабар гузвайвал, ахтармишунар кьиле тухудайла, машин гьалзавайди ацукьзавай чкадин кIаникай анаша авай спичкадин 30 кьвати жагъана. Машиндин иесидин гафаралди, анаша ада маса гун патал ваъ, вичи ишлемишун патал хуьзвай.
Адан гьакъиндай РФ-дин УК-дин 228-статьядин 2-паюнал асаслу яз уголовный дело къарагъарнава.
Интернетдин лутуяр
Полициядиз Мегьарамдхуьруьн райондин 50 йис хьанвай агьалидилай арза атана. Итимдин гафаралди, са вацран вилик ада интернетда авай са сайтда ужуз къиметдай техника маса гузвайдан банкунин картадиз 16 агъзур манат пул хъияна. Амма маса къачур метягь адав къени агакьнавач.
Алай вахтунда къанун-къайда хуьдай органри, интернетдикай менфят къачуна, лутувилел машгъул жезвайбур жагъурзава.
РД-дин МВД-дин пресс-къуллугъди хабар гузвайвал, интернетдикай менфят къачуна, инсанар алцурариз, абурувай пулдин такьатар къакъудзавай дуьшуьшар эхиримжи вахтара гзаф жезва. Гьавиляй интернетдин куьмекдалди тайин са метягь маса къачудайла, дикъетлу хьун герек я.
Ният кьилиз акъатнач
Махачкъаладин Советский райондин полициядин отделдиз шегьерда кардик квай са салондин иесидилай арза атана. Дишегьлиди хабар гайивал, адан салондай 37800 манатдин къиметдик квай телефонни косметика квахьна.
Къанун-къайда хуьзвай органрин векилри кьабулай серенжемрин нетижада тахсиркарвал авунай шак физвай республикадин меркездин 51 йис хьанвай агьали кьуна. Якъин хьайивал, ада ихтилат физвай салонда уборщица яз кIвалахзава. Йикъарикай са юкъуз, вичин агьваллувал хъсанарунин макьсад аваз, ада садазни таквадай макъам жагъурна, телефон ва косметика чуьнуьхна, вичин кIвализ хутахна. Адахъ абур маса гудай ният авай, амма агакьнач: чуьнуьхнавай затIар полицейскийри иесидал агакьар хъувуна.
Тахсиркардин аксина къанундал асаслу яз серенжемар кьабулзава.
Гьазурайди — Агьмед Магьмудов
