Дагъустандин здравоохраненидин министерстводи мукьвара Дербент шегьердин центральный больницада (ЦГБ) ишлемишиз вахкудай ангиографиядин комплексди Кьиблепатан Дагъустандин гзаф кьадар агьалийрин уьмуьр хаталувиликай хкудиз куьмекда. РД-дин здравоохраненидин министерстводи зурба и техника РФ-дин Гьукуматдин резервдин фондунин такьатрин гьисабдай маса къачунва.
— ЦIийи тадаракди рикIин, кьилин мефтIедин, гъилеринни кIвачерин, руфунин органрин ва икI мад дамаррин гьал ахтармишдай, азар пайда хьайи дамаррал, абур атIун тавуна, операцияр кьиле тухудай еке мумкинвилер ачухзава. Сифтени-сифте ида рикIинни дамаррин азаррин, гьа гьисабдай яз инфаркт арадал атунин ва инсан денбеден кьинин вилик пад кьаз куьмекда. Ихьтин тадарак республикадин кьиблепатан мулкарал яшамиш жезвай агьалийриз мукьва хьуни рикIин ва кьилин мефтIедин дамарар кIеви хьайи (закупорка) дуьшуьшра тади гьалда абурув куьмек агакьардай, идалди абур ажалдин къармахрай акъуддай мумкинвал гузва, — къейдна Дагъустандин здравоохраненидин министр Татьяна Беляевади.
ЦIийи тадаракдин куьмекдалди агъадихъ галай ахтармишунар кьилиз акъудиз жезва:
- коронарография (рикIин дамаррин гьал ахтармишун),
- церебральная ангиография (кьилин мефтIедин дамарар ахтармишун),
- аортография, артериография (кIвачерин ва гъилерин дамаррин гьал ахтармишун) ва икI мад.
Ангиографиядин цIийи тадарак кардик акатайла, адал дамаррал операцияр кьиле тухудай 5 хирургди кIвалахда.
И тадарак кардик акатайла, са жерге операцияр, гьа гьисабдай яз гуьтIуь хьанвай дамарда стент тваз, иви акъвазариз (мисал яз, геморрагический инсульт ва я кьилин мефтIедин дамарда аневризма авайла), тромбар (ивидин лахтаяр) акъудиз (мисал яз, рикIин, кьилин мефтIедин, руфунин органрин дамаррай) жеда.
Регина Семедова
