253 хуьр азаднава

Донецкдин халкьдин республикада (ДНР) чкадин къуватри Урусатдин армиядихъ галаз санал Украинадин миллетчийрикай 253-дав агакьна хуьрер азаднава. Идакай ДНР-дин оборонадин штабдин Телеграм-каналди хабар гузва.

“2022-йисан 17-июлдин делилралди, Донецкдин халкьдин республикадин мулкарал ДНР-дин ва ЛНР-дин къуватри РФ-дин­ Яракьлу Къуватрин куьмекдалди, Новая Каменка ва Стряповка хуьрерни кваз, санлай къачурла, инсанар яшамиш жезвай 253 пункт азаднава”, — къейднава малуматда.

Къейд ийин хьи, Украинада кьиле физвай махсус операциядин сергьятра аваз, ДНР-динни ЛНР-дин къуватри РФ-дин армиядихъ галаз санал виликдай Украинадин яракьлу къуватрин гуьзчивилик квай мулкар азад авун давамарзава.

Бес-кьадарда авач

Германиядиз Урусатдин газ галачиз вилик квай кьуьд акъудиз четин жеда. Идакай ФРГ-дин федеральный сетрин агентстводин кьил Клаус Мюллера хабар гана, — къейдзава “Лента.ру” чешмеди.

К.Мюллеран гафаралди, алай вахтунда Германиядин газдин жебехана (газохранилище) 65 процентдин ацIурнава. Урусатдин газ галачиз ам бес кьадарда ацIуриз жедач.

Эгер Урусатдивай газ маса къачуз тахьайтIа, Германияди ам Норвегиядивай, Нидерландривай ва Бельгиядивай маса къачудайвал я.

ТIимил хьун мумкин я

Индиядин “The Statesman” изданидин обозреватель Сунил Шаранан фикирдалди, Урусатдиз акси яз тухузвай сиясат себеб яз, Джо Байденаз нубатдин сеферда США-дин президент хкядай сечкийра сесер тIимил хьун мумкин я.

Адан фикирдалди, США-дин гьукумдин кьиле Байден акъва­зайдалай кьулухъ уьлкведин агьалийрик инфляцияди къалабулух кутазва. И кар себеб яз, Америкадин президентдиз чкадин агьалийри ийизвай ихтибар къвердавай тIимил жезва.

Сунил Шарана къейд авурвал, Украинада кьиле физвай гьерекатар себеб яз, рагъакIидай патан вири уьлквейри Владимир Путиназ акси сиясат тухузва. Ихьтин шартIара Европадин хейлин уьлквейра гьалар пис патахъ дегиш жезва. Мисал яз, США-да бензиндин къимет садлагьана хкаж хьанва.

Мягькемардай ниятар ава

Великобританиядин премьер жез кIанзавайбурукай сад уьлкведин алишверишдин министрдин заместитель Пенни Мордонт я. Эгер вичикай премьер хьайитIа, адахъ Западдин уьлквейри Уру­сатдиз акси яз тухузвай сиясат мадни мягькемардай ниятар ава. Идакай “Лента.ру” чешмеди хабар гузва.

“Премьер-министрдин къуллугъдал зун Украинада авай чи дустар азадвилин сагьибар хьунин къайгъуда жеда. Хейлинбуру хьиз зани мукьвара жуван кIвале Украинадай куьч хьуниз мажбур хьанвай са кас кьабулна”, — лагьана сиясатчиди.

Гьа са вахтунда ада къейд авурвал, Британиядихъ Урусатдихъ галаз къалра жедай ниятар авач. Адан фикирдалди, исятда Украинада кьиле физвай вакъиаяр «ивирринни идеалрин акъа­жунрин” са пай я ва гьалар пайгардик кухтун, Украинадиз куьмекун патал либералрини демократри чпин къуватар садна кIан­зава.

ЦIун къурбандар

Томскдин областдин Молчановский районда авай Колбинка хуьре кIвали цIай кьунин нетижада вад аялни чIехи кьве кас телеф хьана. Абурун мейитар цIай хкадарайдалай кьулухъ жагъа­на, — хабар гузва ТАСС-ди.

Чешмедин делилралди, са мертебадин кIарасдикай эцигнавай кIвали цIай кьунин нетижада са касни къутармишиз хьанач. Бедбахтвилин дуьшуьшдин гьакъиндай уголовный дело къарагъарнава. Алай вахтунда силисчийри цIай кьунин себебар тайинарзава, герек тир ахтармишунар кьиле тухузва.

Къейд ийин хьи, са тIимил вахт идалай вилик Рязандин областдин Спасский райондин Огородниково хуьре кIвали цIай кьуникди кьве кас телеф хьанай.

Кьве кьил алай мурдар

Индиядин Деоли шегьерда чкадин агьалийриз кьве кьил алай мурдар акуна, хабар гузва Ютубда авай “Jam Press” каналди.

Раджастхан штатда авай шегьердин килисадин патав акунвай мурдардин яргъивилел 17,7 сантиметр алай. Чкадин пешекарри тайинарайвал, ам лекеяр алай удав я. Инсанар патал и жинсинин мурдарар хаталу туш, гьикI лагьайтIа, абурухъ агъу авач. Асул гьисабдай ихьтин мурдарар Индияда, Непалда, Бангладешда, Пакистанда ва Шри-Ланкада гьалтзава.

Деоли шегьердин тIебиатдин къаравулда акъвазнавай махсус центрадин векилри аламатдин мурдар гила чпин центрада хуьзва. Абурун гафаралди, тIебиатда тек-туьк гьалтзавай ихьтин мурдарар, адет яз, яргъалди яшамиш жезвач. Ахтармишунри къалурайвал, мурдардин тахминан зур йис я.

Виликдай США-да кьве кьил алай мурдар 17 йисуз яшамиш хьайиди малум я. Адан яргъивили метрни зур тешкилзавай.

Гьазурайди — Агьмед Магьмудов