Алатай гьафтеда Кьурагь районда мугьманвиле авайла,  Сергей Меликов ина здравоохранение вилик физвай гьалдихъ галазни таниш хьана.

КьепIирдал С.Меликов участокдин больницадиз килигна. Амбулаториядивай агьалийрин истемишунриз жаваб гуз жезвач. Ам авай дарамат акьван куьгьне хьанва хьи, анаг капитальнидаказ ремонт ийиз жедай гьалда амач. Ихьтин чIуру шартIар арадал атанвайвиляй амбулаторияда алай аямдин тадаракар эцигиз, абурукай менфят къачуз жезвач. Амбулаториядин коллективди Сергей Меликовавай хуьре цIийи больница эцигун тIалабна. Региондин Кьили и месэла гьялун хиве кьуна.

Агьалийрин сагъламвал хуьнин рекье авай мумкинвилерихъ галаз Сергей Меликов Кьурагьа райондин центральный больницадиз ва поликлиникадиз финалди таниш хьана. Кьурагьрин ЦРБ-дин дарамат (ана 55 чарпай ава), амайбурув гекъигайла, алай аямдив кьунвай дараматда кардик ква. Рентген-кабинетдалди, хсуси лабораториядалди, физкабинетдалди, УЗИ-дин ва диагнос­тикадин аппаратралди таъмин тир анаг, са сменада 185 кас кьабулдай мумкинвал авай поликлиникадин дарамат (сборно-щи­товой) писди туш. Амма, поликлиникадин дараматда капитальный ремонт кьиле тухун тавурди, гьакIни алай аямдин истемишун­риз жаваб гузвай санитариядин шартIар тахьун  фикирда кьуналди­, медицинадин цIийи объект эцигунин месэла къарагъарна. Идахъ галаз алакъалу яз, Сергей Меликова Муги хуьруьн чешнедалди модульный больница эцигунин месэладиз килигун хиве кьуна. Ри­кIел хкин: региондин Кьили модульный больницайрин конст­рук­цийрин еридиз ва эцигунин къулайвилиз Акуша районда кIва­лахдин рекьяй мугьманвиле авайла къимет ганай.

Кьурагь  районда  авайла  Сергей  Меликова  медперсоналдихъ галаз суьгьбетарна ва коронавирусдин тIугъвалдин девир­да чIугур зегьметдай сагърай лагьана. Региондин Кьилин фикирдалди, санлай къачурла, къенин юкъуз районда здравоохранение вилик физва.

Чи мухбир