2016-йисан июлдин варз тир. Зи хтулдин кефияр чIур хьана, ам дух­турдин патав тухвана кIанза­вай. Зани зи уьмуьрдин юлдаш Гуьла­гъа­ди  хтул СтIал Сулейманан райондин центральный  больницадин садакай масадак акатдай азаррин отделенидин заведующий Саид Саидован патав тухун меслятна. Зи дуст Саид духтурдин ери-бине До­къузпара райондин Миграгъай я. Мединститут куьтягьайла, ам чи райондин больницадиз рекье тунай. Ада Кьасумхуьрел кIвалер эцигна, ина адан ая­лар чIехи хьана, гила абурузни чпин хизанар хьанва. Саид духтур миграгъви тирди лап тIимил инсанриз чида. Вахт санал акъвазнавач. Яргъал йисара зегьмет чIу­гур Дагъустан Республикадин ла­йихлу духтур лагьай тIвар­цIин сагьиб С.Саидов алай вахтунда пенсиядиз экъечIнава. Адалай рай­онэгьлийри гьамиша разивална. Куьмек кIанз, кIвализ фейибурузни адан патай садрани “ваъ” хьанач, гилани лугьузвач. Сагърай вич! Ам жегьил духтурриз хъсан чешне я…

Пак чка ичIи яз амукьдач, лугьузва бубайрин мисалда. Къенин зи суьгьбет, Саид духтур хьиз, паталай атана, чи районда духтур-инфекционист яз кIвалахзавай, адан рехъ уьзягъдаказ давамарзавай, агьалийрин патай гьуьрмет къазанмишиз алакьнавай  Сали­гьат  Халидова  Агьмедрасуловнадикай  я.

Хтул азарлу хьайи дуьшуьшда, Саид духтур отпускда аваз, чун садакай масадак акатдай азаррин отделенида адан везифаяр тамамарзавай жегьил пешекар дишегьлиди кьабулнай. Адан патав фидалди, заз ам аварви дишегьли тирди чир хьана. Кабинетдиз гьахьайла, лацу халат алай дишегьлиди чун хушвилелди кьабулна. Заз адан ери-бине Ботлихдай тирди чир хьайила, за телефондай Махач­къалада яшамиш жезвай зи дуст, ботлихви Камилаз зенгна. Телефон вугана Салигьатав, ам Камилахъ галаз авар чIалал рахана.

Малум хьайивал, Салигьатан диде Патиматни  Камил, Ботлихдин юкьван школада са классда кIелна, чеб чпиз хъсандиз чизвай ксар тир. Салигьатан дах Агьмедрасулни Ботлих райондай я. Алай вахтунда абурун хизан Къизилюрт­да яшамиш жезва. Патимата ина юкьван школада къецепатан чIалан тарсар гузва. Агьмедрасул пенсиядиз экъечIнава. Абурухъ ругуд руш ава. Кьуд руша медунивер­ситет куьтягьнава, чпин кеспидай кIва­лахзава. ГъвечIи руша алай вахтунда медуниверситетда кIел­зава. ЧIехи руш Зульфияди Москвада са больницадин кьилин духтурдин заместитель яз кIвалахзава. Сали­гьат 1990-йисуз Къизилюртда дидедиз хьана. 2006-йисуз ина  юкьван школа лап хъсан къиметралди куьтягьна, Дагмедакадемиядин педиатриядин факультетдик экечIна. 2012-йисуз вуз хъсан къиметралди акьалтIарай руш ина интернатурадик экечIна, ада садакай масадак  акатдай  азарар  сагъардай духтур (инфекционист) хьун кьетIна. 2013-йисуз интернатура акьалтIарай адаз СтIал Сулей­манан райондиз акъатун кьисмет хьана…

Махачкъалада медакадемияда кIелдай вахтунда Салигьат са ме­хъерик  фена. Ина ам ДГУ-дин  экономикадин факультетда кIелза­вай кьасумхуьруьнви, хъсан акунар авай жегьил Надирахъ галаз таниш хьана. Адан буба Валентин Халидова а чIавуз СтIал Сулейманан райондин госбанкдиз регьбервал гузвай. Надира юкьван школа лап хъсан къиметралди куьтягьнавай. Къени къилихрин кьегьалдин рикIе мехъерик таниш хьайи руш гьатна, чпиз чеб хуш хьана. Вахтар физвай­, абурун муьгьуьббатни къвердавай къуватлу жезвай. Надира Салигьат Махачкъалада яшамиш жезвай вичин баде Минаятан  патав­ тухвана, абур танишарна, чпин гьиссерикай хабар гана. Минаят бадедиз Салигьат акунмазди бегенмиш хьана. Ада жегьилриз, гьи­кьван четинвилер хьайитIани, къастунал кIевиз акъвазунин, садаз сад рикIи­вай кIан ятIа, мехъер авунин, цIийи хизан арадал гъунин меслят гана. Надирани Салигьата вузар куьтягьна, диде бубайривай ихтияр къачуна, мехъер авун меслятна…

Гьа икI, йикъарикай са юкъуз Надиран эмеяр, мукьва-кьили дишегьлиярни галаз Салигьатан ди­де-бубадин патав Къизилюртдиз фена. Ина абурун кIвалах туькIве­нач, Салигьатан диде-буба рази хьанач. Абуруз чпин руш маса миллетдин векилдиз гуз кIанзавачир. Амма Салигьата, Надир амаз, вич масадаз кьисмет жедач лагьана, кIевивална. Надиран буба Валентинан дуст Анвар Аюбова Махачкъалада ГАИ-дин постунал кIвалах­завай. Анваран дуст Набиев Гьабибни и постунал инспектор тир. Валентина вичин гададиз аварвиди руш тагузвайди вичин дуст Анвараз лугьуда кьван. Анвараз чир хьана вичин дуст Гьабиб Салигьатан ими тирди. Гьабиба вичин стха Агьмедрасулаз, мукьва-кьилийриз Надиран диде-буба хъсан инсанар, Надир акьуллу гада тирди, Салигьат Надираз кьисмет хьайитIа, ам бахтлу жедайди лугьуда. Гьа икI, Агьмедрасулни Патимат рази хьана. 2013-йисан гатуз Надирни Салигьат эвленмиш хьана. Салигьат Кьасумхуьрел райбольницада духтур-инфекционист яз кIвалахал кьабулна. Жегьилдикай хъсан пешекар хьуник Саид духтурди лайихлу пай кутуна. ИкI, 2020-йисан февралдиз, Саид духтур пенсиядиз фейила, садакай масадак акатдай  азаррин отделенидин заведующийвиле Салигьат Агьмедрасуловна тестикьарна..

Алай вахтунда и отделенида 22 касди кIвалахзава. 25 кас сагъардай мумкинвал ава. РикIел хкин: 2020-йисан апрелдиз и отделение агална, ковиддин госпиталдиз элкъуьрнай. А вахтунилай кьулухъ та­мам кьве йисуз (2022-йисан апрелдалди) ковиддин азардикай ина 500-далай виниз азарлуяр къутармишна. Больницада азарлуяр тIе­гъуьндин къармахрай акъудун патал дарманар, СИЗ-ар (средства индивидуальной защиты) лазим кьадар авазвай. Райондиз а чIавуз регьбервал гузвай Нариман Абдулмуталибова, больницадин кьилин духтур Жафер Къурбанисмаилова, бизнесмен Салман Бабаева, “Рычал-яд” заводдин регьберри, гьакI са кьадар маса районэгьлийрини чпивай жедай вири куьмекар гана, лазим кьадар дарманар къачуна. А чIавуз Салигьат духтур са шумуд сеферда Кьасумхуьруьн телевиденидай рахана, ковиддин азардикай чеб гьикI хвена кIандатIа, район­эгьлияр хабардарна. Ковиддикди азарлу хьанвай гзаф кьадар  инсанри, больницадиз тефена, чеб, кIва­лера дарманар хъваз, рапар ягъиз, сагъар хъувуна. Абурукайни сад зун я… Лугьун лазим я хьи, кIва­ле­ра сагъар хъийизвай агьалиярни садакай масадак акатдай азаррин отделенидин регьберди гуьзчивиликай хкудзавачир.

Салигьат духтурдин кIвалахдиз райондин администрацияди ва здравоохраненидин министерстводи еке къимет гана. Россиядин Президент В.В.Путина адан зегьмет Гьуьрметдин грамота гуналди къейдна. Виридалайни еке къимет инсанри гана, коллективда адан авторитет мадни хкаж хьана.

Макъала кхьидайла, зун  райондин центральный больницадин кьилин духтур Жафер Къурбанисмаиловахъ галаз телефондин куьмекдалди алакъадиз экъечIна. Салигьат духтурдикай заз “Лезги газетдиз” макъала рекье тваз кIан­завайдакай лагьана, адан кIвалах­диз гьихьтин къимет гузватIа хабар кьуна. Жафер духтурди заз ихьтин жаваб гана: «Салигьат Агьмедрасуловна вичин кIвалах лап хъсандиз чидай духтур, хъсан инсан я. Зун ада везифаяр кьилиз акъудзавай гьалдилай, адан кIвалахдилай рази я».

— Кьасумхуьрел яшамиш жез башламишай сифте вахтара четин хьанай. Лезги чIал чизвачир, мукьва-кьилияр авачир,-рикIел хкизва Салигьата.

Надиразни Салигьатаз Каспийск шегьердиз физ кIан хьана. КIвалер эцигиз чилни маса къачунвай, амма Салигьатаз Кьасумхуьруьн тIебиат гзаф хуш тир. КIвала­хал фейила, цIийи танишар хьана, агьалийрин патай гьуьрмет, кIва­лахзавай отделенида авторитет артух жезвай. Лезги чIал чир хьана. Галаз-галаз кьве аял — Амирханни Лейла — гъилиз атана. Жегьилрин планар дегиш хьана. Абуру Каспийскда къачур чил маса хгана. Кьасумхуьрел чпиз кIвалер маса къачуна. Хуьре адет тирвал, верч-кIек, къазар хуьзва, багъ кутунва. Амирхан 3-классдиз акъатнава, Лейладин вад йис я. Чеб бахтлу хьурай! Чпикай чи халкь машгьурдай инсанар хкатрай! “Россети” компанияда инженер яз кIвалах­завай уьмуьрдин юлдаш Надиралай, вич адаз кьисмет хьунилай  Салигьат гзаф рази я. Къизилюртдай къвезвай мугьманризни абур яшамиш жезвай къайда, Кьасумхуьруьн тIебиатни пара хуш хьанва. Салигьатан чIехи вах Зульфияди, гьар йисуз Москвадай хквез, СтIалрин «Кпул ятар» санаторийда ял язава.

Зун Валентинан кIвализ мугьман хьанвай. Иниз мугьмандиз ая­ларни галаз Надирни Салигьат акъатна. Са арадилай заз ван хьана хьи, Салигьат “я дах” лугьуз рахазва. КилигайтIа, — Салигьата дах Ва­лен­тиназ лугьузва. Заз и кар гзаф хуш хьана. Валентинан уьмуьрдин юлдаш Инна вичин хцин сусалай рази я. Лезги чIал, милли хуьрекар чир хьанвайди, лезги адетрал амал­завайди къейдзава.

Дугъриданни, Надирни Сали­гьат бахтлу инсанар я. Чеб генани бахтлу хьурай! Муьгьуьббат гзаф къуватлу гьисс я. Къуй вири же­гьил­ри чпин мехъерар арада муь­гьуьб­бат аваз авурай!

Масуб Магьмудов