Малум тирвал, алай йисуз республикада мектебрин дараматар цlийикlа туькlуьр хъувун патал 4,4 млрд манат пул чара авунва.
РД-дин образованидин ва илимдин министр Яхья Бучаеван гафаралди, алай йисуз 109 объектдал цlийи хъувунин кlвалахар кьиле физва.
И йикъара чун кlвалахар кьиле физвай Дербент райондин Белиж поселокдин 2-нумрадин юкьван мектебдиз фена.
Алай йисуз мектебда 320 аялди чирвилер къачуна. Абурукай 27 аялди — 9 ва 17 аялди 11-класс акьалтlарна.
Мектебдин дараматда апрелдин эхирдилай цlийикlа туькlуьр хъувунин кlвалахар гатlуннава.
Мектебдин директор Анжелика Агъабеговадин гафарай малум хьайивал, кlелунин йис акьалтl тавунмаз, кlвалахрив гатlунунин себеб абурун кьадар гзаф хьун я. Тарсариз кьецl тагун патал, чирвилер къачузвай аялар кьвед лагьай дараматдиз акъудна, тарсар кьве сменада тухвана. Дугъриданни, мектебда цlийикlа туькlуьр хъувунин кlвалахар зурбаз кьиле физва. Чаз акурвал, полдин тахтаяр, рак-дакlар, куьгьне сувагъар вири акъудна ва алуднава. Дараматдин кьве залдин къаварни алуднава. Ина кlвалахар худда кьиле физва. Садбуру къавуз ракь язава, муькуьбуру — классрин цларизни къавариз сувагъар.
Прораб Халид Багьаудинован гафаралди, мектебдин дараматдани кьве залда демонтаждин кlвалахар акьалтlарнава. Майдилай къенин йикъалди бригадади цlийикlа туькlуьр хъувунин кlвалахар 70 % тамамарнава. Мектебдин дараматдин 1-мертебада хъувуна кlанзавай кlвалахар ама. Вири классрин къенериз сифте накьвар, ахпа чиргъ вегьеда, гуьгъуьнлайни къир цада, ахпа полдиз тахтаяр яда. Рак-дакlар, электричестводин, чими ийидай линиярни цlийибуралди эвезда. Санлай къачурла, ина 36 миллион манатдин кlвалахар кьиле тухуда. Материалрин патахъай кьитвал авач.
Х. Багьаудинова яргъарай къвезвай рабочийриз шартIар тешкилунай ва мектебдин ашпазри рабочийриз нисинин тlуьнар гьазуриз куьмек гунай мектебдин директор Анжелика Агъабеговадиз ва ашпазар тир О.Мамедовадизни С.Мирзабеговадиз сагърай лагьана.
Къагьриман Ибрагьимов, хсуси мухбир
