4-июлдиз Мегьарамдхуьруьн райондин администрацияда, адет хьанвайвал, мектебар лап хъсан нетижайралди акьалтIарнавай жегьилар шад гьалара къаршиламишунин мярекат кьиле фена. Райондин кьил Фарид Агьмедова выпускникрив “Чирвилер къачунин гьерекатда акьалтIай агалкьунрай” къизилдин медалар ва аттестатар вахкана. Алай йис, Ф.Агьмедова къейд авурвал, муниципалитетдин мектебри виле акьадай нетижайралди акьалтIарна: 21 жаванди къизилдин медалар къачуна: “Къизилдин 21 медаль — им лап хъсан нетижа я. И карди чак дамахдин гьиссер кутазва. Агалкьунрик куь муаллимрин, диде-бубайрин зегьметни квайди якъин я. Гьаниз килигна, заз къе гьабурузни мубарак ийиз ва чIугунвай зурба зегьметдай чухсагъул лугьуз кIанзава. Къуй абуру квек кутунвай умудар кьилиз акъатрай!” — лагьана Ф.Агьмедова.
Райондин кьили мектебра кIелзавай йи-сара жаванри олимпиадайра, конкурсра, спортдин акъажунра ва маса важиблу мярекатра иштиракуналди, муниципалитетдин тIвар виниз акъудунилайни разивал авуна.
“Куьне квевай вилик виниз тир макьсадар эцигиз ва абур кьилиз акъудиз алакьзавайди субутна. Умуд кутазва, гележегда квекай гзафбуру, лап хъсан пешекарар яз, хайи райондин месэлаяр гьялунин кардик пай кутада. Гьакъисагъ зегьметди ва сабурлувили квез жемятдин арада лайихлу ксар, гьакIни лап хъсан пешекарар жез куьмекда”, — алава хъувуна ада.
Мярекатдал рахай выпускникрин диде-бубайрикай сад — машгьур журналист ва политолог Руслан Къурбанова райондин кьиле авайбуруз образованидин хилез кьетIен фикир гунай, бажарагълу аялриз мумкинвилер ачухунай, куьмек гунай сагърай лагьана. Мярекатдал разивилин келимаяр выпускникрини лагьана.
Инал кьилди къейд ийиз кIанзава хьи, райондин 21 медалистдикай 2 жегьилди Билбилхуьруьн-Къазмайрин Мегьти Абдуллаеван тIварунихъ галай юкьван мектеб акьалтIарнава. Билбилхуьруьн СОШ-да кIелзавай аялри хайи мектебдин тIвар, республикадин конкурсра, олимпиадайра агалкьунралди иштиракуналди, мукьвал-мукьвал раижзава. Ина муаллимри, чирвилер гунин гьерекатдилай гъейри, аялар, акьалтзавай несил ватандал, тIебиатдал, хайи ерийрал, жуван тарихдал рикI алай инсанар яз чIехи хьунин месэлайриз кьетIен фикир гузва.
5-июлдиз Билбилхуьруьн-Къазмайрин юкьван мектебда 9-классар акьалтIарнавай жаванрин уьмуьрда кьетIен, важиблу мярекат кьиле фена. Абурув умуми асул образованидин гьакъиндай документ — аттестатар вахкана. Къайгъусуз аялвилин вахт кьулухъ тунвай жаванри гила чпин гележегдин уьмуьрдиз талукь къарар — 10-классдиз фин ва я пешекар образование къачун — кьабулун лазим я.
Аттестатар вахкайдалай кьулухъ мектебдин директор Тимур Мурадович Саидова ва классрин руководителри выпускникриз тебрикдин гафар лагьана, гележегда агалкьунар хьун алхишна.
1-июлдилай Билбилхуьруьн-Къазмайрин юкьван мектебда кIелзавай аялар йикъан вахтунда жедай гатун лагерди кIвалах башламишнава. Смена 21 юкъуз давам жеда. Мектебдин гегьенш гьаятда пакамлай аялрин рахунрин, хъуьруьнрин ванер жезва. Абуру югъ зарядкадилай, спортдин упражненийрилай башламишзава, аялри и карда рикI алаз иштиракзава. Сменадин кIвалах башламишдайла гатун лагердин кьиле авай Ф.Къурбалиевади аялар хатасузвилин истемишунрин гьакъиндай тагькимарна. Гуьгъуьнлай аялрив чпикай гьар садакай суьгьбет ийиз туна, лагерда квел машгъул жедатIа, гьа крар веревирдна.
Жасмина Саидова
