Макроналай нарази я
Францияда нубатдин гъулгъуладин лепе къарагъзава: уьлкведа кардик квай сиясатдин жуьреба-жуьре партийрин векилри президент Эммануэль Макроназ кIвалахдилай элячIуниз эвер гузва.
“Лента.ру” чешмеди къейдзавайвал, Франциядин регьбердиз акси экъечIзавайбурун фикирдалди, Э.Макрона Америкадин “Uber” тIвар алай карханадихъ галаз алакъаяр хуьзва. Малум тирвал, 2015-йисуз, экономикадин министрдин къуллугъдал алаз, Э.Макрона “Uber” кархана Франция машгьур хьун патал куьмекар ганай.
Европарламентдин депутат Джордан Барделлади гьисабзавайвал, Франциядиз регьбервал президентди ваъ, къецепатан уьлквейрин карханайрин итижриз къуллугъзавайбуру гузва.
Къейд ийин хьи, 2015-йисуз Франциядин полицияди уьлкведин са шумуд шегьерда “Uber” карханадин кIвалах акъвазарнай. И кардин кьилин себеб компанияди чкадин къанунрал амал тийиз кIвалахун тир.
Синдзо Абэ яна кьена
8-июлдиз Япониядин Нара шегьерда сечкийриз талукьарнавай мярекатдал рахазвай чIавуз уьлкведин виликан премьер-министр Синдзо Абэ яна кьена. Идакай “Лента.ру” чешмеди хабар гузва.
Дуьшуьшдин шагьидрин гафаралди, къанлуди Абэдин кьулухъай кьве гуьлле ахъайна: сад лагьайди галукьнач, кьвед лагьайда сиясатчи чилел ярхарна. Са шумуд сят арадай фейила, Синдзо Абэди азарханада чан гана.
Къанлу тахсиркарвал авур чкадилай катнач, ам Абэдин къаравулри кьуна. 41 йис хьанвай Тэцуя Ямагамиди, Япониядин къанун-къайда хуьдай органриз вичи авур тахсиркавилин гьакъиндай баянар гудайла, къейд авурвал, ам Синдзо Абэдилай рази тушир. И кар себеб яз, къанлу ам рекьидай фикирдал атана.
Ислягьвал гваз фида
США-дин гьукумдин кьилевайбуруз Саудиядин Аравиядиз яракь маса гунал эцигнавай къадагъа къуватдай вегьез кIанзава. Идакай “Лента.ру” чешмеди хабар гузва.
Америкадин са агентстводин делилралди, июлдин юкьвара Джо Байден Мукьвал тир Шаркь патаз фидайвал я. И кардихъ галаз алакъалу яз, США-дин президентдин администрацияда махсус совещание кьиле фена. Адан сергьятра аваз, жуьреба-жуьре месэлайрихъ галаз санал винидихъ къейд авур месэлани веревирдна.
Чкадин СМИ-ри хабар гузвайвал, Джо Байденаз Саудиядин Аравиядихъ галаз алакъаяр хъсанариз кIанзава. И кардихъни себебар авачиз туш. Мисал яз, США-дин регьбердиз Персиядин заливдин уьлквейрай энергоресурсар маса къачудай ва Ирандиз акси сиясат тухунин карда амадагар жагъурун патал араб уьлквейринни Израилдин арада авай алакъаяр мягькемардай ниятар ава.
Виликдай Израилдин премьер-министр Яир Лапида хабар гайивал, Джо Байден Саудиядин Аравиядиз Израилдин патай ислягьвал гваз физва.
Махсус центр тешкилда
Молдавияни Европадин комиссия (ЕС) Украинадай гъизвай яракьар, тиряк ва инсанар маса гунихъ галаз женг тухудай махсус центр арадал гъидай фикирдал атанва. Идакай ТАСС-ди хабар гузва.
ЕС-дин векил Ильву Йоханссонан фикирдалди, алай вахтунда Украинада кьиле физвай вакъиайри дуьньядин жуьреба-жуьре уьлквейра авай гьалариз таъсирнава, гьа жигьетдай яз — Молдавиядани.
ЦIийиз арадал гъидай центради, винидихъ къейд авур месэлайрилай гъейри, сергьятдилай къанунсуздаказ инсанар санай-масаниз ракъурун ва терроризмдиз акси яз кьиле тухузвай серенжемарни гуьзчивилик кутада.
“Балугърин марф”
Индиядин Джагтиал шегьердин агьалияр аламатдин вакъиадин шагьидар хьана: Телангана штатда авай и шегьерда тамам кьве йикъан къене «балугърин марф» къвана.
“ABP Live” изданиди хабар гузвайвал, сифте къати марф къвана, гуьгъуьнлай цавай балугъар аватиз гутIунна.
Пешекаррин баянралди, гьуьлерал пайда жезвай къати гарари цин куьлуь гьайванар (хъипер, акьрабар, балугъар) цавуз, яргъал мензилриз акъудзава. Са кьадар вахт арадай фейила (гарун къуват зайиф хьуникди), абур зарб гьерекат кваз чилел аватзава.
Виликдай СМИ-ри США-дин Техас штатдин са шегьердани тIурфандилай гуьгъуьниз “балугърин марф” къвайидакай хабар ганай.
Лекьендиз къаст авуна
Индиядин Раджопа тIвар алай хуьре лекьенди 4 йис хьанвай аял кукIварна. Идакай “Daily Mirror” изданиди хабар гузва.
Аял вичин имидин кIвалерин вилик къугъвазвай. Садлагьана там галай патахъай лекьен пайда хьана ва, инсанриз акваз-акваз, ада аялдал вегьена, ам тамуз галчIурна.
Чкадин агьалийрикай садан гафаралди, абур гьасятда вагьшидин гуьгъуьниз фена. Амма инсанар агакьдалди, саки зур километрдин мензилдиз галчIурнавай аялдиз лекьенди еке хасаратвилер ганвай. Ажугъдив ацIанвай хуьруьнвийри лекьен кьена. Аял тади гьалда духтурханадиз агакьарнатIани, ам къутармишиз хьанач.
Гьазурайди — Агьмед Магьмудов
