Лезги халкьдин образование. Дагъустандин амай дагъвийриз хьиз, лезгийризни образование мектебри ва медресайри гузвай, анра араб чlал ва Къуръан кlелиз чирзавай. Диндин рекьяй чирвилер гузвай маканар гьар са хуьре кардик квай мискlинар тир. Икl, ХIХ асиррин эхирра Куьре округда 194 мискlин авай, Самур округда — 102. Тек са Ахцегьа 16 мискlин авай, абурукай виридалайни чlехиди Абумуслиман мискlин тир.
Умуми садакьа. Вилик девирда, са адетдай малум тирвал, хуьруьн жемятдин пулдихъ маса къачунвай яру рангунин жунгав йифиз пуд сеферда хуьрелай элкъуьрдай ва ахпа тукlвадай. Як вири хуьруьнэгьлийриз гудай. Ихьтин “къурбандди” къарамалар кьиникьикай хуьдайди яз гьисабзавай.
Ругъунри хийир гана. ХIХ асирдин кьвед лагьай паюна лезгийрин ва табасаранрин арада ругъунар гьасилунин кар гегьеншдиз чкlана. Ругъунри магьсулдарвал саки арадай акъудна. Абур гьасилуни халкьдиз магьсулдарвилелай са шумуд сеферда артух хийир гана.
Лезгийрин сеняткарвилер. ХХ асирда лезгийрин уьмуьрда гамар хрунин, кlарасдикай затlар туькlуьрунин, чатухъанвилин, заргарвилин, яракьрин ва маса жуьредин сеняткарвилери гегьенш чка кьуна. Гьар са лезги хуьр махсусдаказ са тайин затlар арадал гъунал машгъул хьана.
Гьазурайди — Куругъли Ферзалиев
