Меслятдал атанач
США-дивайни Китайдивай чпин арада авай алишверишдин дяве акьалтlарун патал тайин меслятдал къвез хьанач. И месэладин гьакъиндай кьве йикъан къене кьиле фейи рахунар 4-майдиз куьтягь хьана.
“Bloomberg” чешмеди хабар гузвайвал, и кьве уьлкведикай садани рахунрин эхирдай официальный арзаяр малумарнач. Амма, документри къалурзавайвал, США-ди Китайдивай кьве уьлкведин арада авай алишверишдин зарар тlимиларун истемишнава.
Вашингтондинни Пекиндин алакъаяр алай йисуз США-ди маса гьукуматдай гъизвай метягьдал еке харжар эцигунин серенжемар малумарайдалай кьулухъ къизгъин хьана. Кьилди къачуртlа, а серенжемар Китайди акъудзавай метягьриз талукь тир. Вичин нубатда, Китайдини США-дай гъизвай метягьриз талукь яз серенжемар кьабулна. И гьерекатди Вашингтондин патай наразивал арадал гъана.
Тиряк жагъана
Норильск шегьердин аэропортуна са пассажирдивай 2,5 килограмм синтетикадин тиряк вахчуна. Ада бейгьуш аялрин ем жедай банкада ва цин фильтрда чуьнуьхнавай. Идан гьакъиндай МВД-дин официальный векил Ирина Волкди малумарнава.
Кемеровский областдин 23 йисан яшда авай агьали самолетда аваз Новосибирскдай Таймыр полуостровдиз фена. Жегьилдив чинебан бейгьуш гвайдакай полициядин къуллугъчийрив вахтунда хабар агакьнавай. МВД-ди ам ахтармишай видеоинтернетдин махсус сайтдиз акъудна. Жегьилди Новосибирск шегьерда кирида кьунвай кlвал ахтармишунин нетижадани анай 200 грамм тиряк жагъана.
Тиряк гваз кьур жегьилдиз талукь яз уголовный дело къарагъарнава.
Иракдини гьужумна
Иракдин ВВС-ри Сириядин Эль-Дашиша мулкара авай ИГ-дин (Россияда къадагъа авунва) террористрин дестеяр алай чкайрал цавай гьужумна. Идан гьакъиндай “Reuters” чешмеди хабар гузва. Къейднавай райондал США-ди куьмекзавай курдринни арабрин “Сириядин демократиядин къуватрин” аскеррин дестеди гуьзчивал тухузва.
5-майдиз “Гарри Трумэн” авианосец кьиле аваз США-дин авиациядинни ВМС-дин дестеди Сирияда авай ИГ-дин мулкар бомбаламишиз эгечlна. Кlватlалдик “Нормандия” крейсер ва “Арли Берк”, “Балкелей”, “Форест Шерман”, “Фаррагут” ракетаярни квай.
Сириядин МИД-ди ислягь агьалияр кьинихъ галаз алакъалу яз Америкадин кьушунрик тахсир кутуна ва ООН-диз чар ракъурна.
Гуя химиядин яракьар гьазурзавай ва хуьзвай чкаяр тергзавайди я лугьуз, Сирия 14-апрелдиз США-дин, Великобританиядин ва Франциядин ракетайрин ягъунрик акатнай. Химиядин яракьар къадагъа ийизвай тешкилатди (ОЗХО) а чlавуз химиядин гьужумдин гьакъиндай тир малумат къалпди яз гьисабна, ам тестикьарнач.
Кар алай месэла къейдна
Россиядин Президент Владимир Путина гьукуматдин членрихъ галаз кьиле фейи гуьруьшдал къейд авурвал, мукьвал йисара кьилиз акъудун патал кар алай месэла уьлкведин агьалийрин гьакъикъи дуллухдин кьадар артухарун я.
“И кар патал исятда чахъ хъсан база ава. Экономикадин умуми дурумлувал хкаж хьанва, ам вири четинвилерай, гьа жергедай яз санкцийрихъ галаз алакъалубурайни акъатна”, — лагьана уьлкведин Кьили.
В.Путина министррин кабинетдин кlвалахдиз, санлай къачурла, разивилин къимет гана ва премьер-министр Дмитрий Медведеван лайихлувилер къейдна.
Эменни — кациз
Италияда пенсияда авай дишегьлиди миллионни зур евродин къимет авай вичин эменни, ирс яз, кациз туна. И къариба хабар Италиядин са чешмеди раижнава.
Пилу лакlаб алай кацин иеси Анна Чечилияди вири уьмуьрда Италиядин министррин советда кlвалахна. Ам 88 йисан яшда аваз кечмиш хьана. Аннадиз кац са шумуд йис идалай вилик куьчедилай жагъанай. Дишегьлидихъ я итим, я аялар авачир. Рекьидалди са тlимил вилик ада вири эменни рикl алай кациз амукьун патал веси авуна.
Пилудин мал-девлет пул эцигдайбурун фондунин векилрин ихтиярда ава. Аннадин весидал асаслу яз, и пулдихъ кациз ветеринариядин къуллугъар авун, яшамиш жедай къулай чка тешкилун ва адан игьтияжар кьилиз акъудун лазим я. Кациз цlийи иеси хьайитlани, а касдиз кацин эменни вичиз кlанивал харждай ихтияр жедач. Пилу кьейидалай кьулухъ пул гьайванрин къайгъударвалзавай са тешкилатдиз амукьда.
Кьушунрин тарифна
Украинадин президент Петр Порошенкоди вичин уьлкведин армия дяве авунин карда виридалайни къуватлубурукай я лагьана. Идан гьакъиндай ада Германияда, вири халкьарин Combined Resolve вердишвилера Украинадин аскерри иштиракдайла, Facebook соцсетда къейдна.
Адан гафаралди, вердишвилерин серенжем тешкилайбур, Украинадин аскеррин жуьрэтлу ва таъсирлу гьерекатар себеб яз, сценарий дегишаруниз мажбур хьана. Серенжемдин вахтунда абуру шартlуналди душмандин 10 техника тергна.
Къейд ийин, вердишарунин Combined Resolve серенжемар США-дин ВС-дин командованидик кваз Европада гьар йисуз кьведра кьиле тухузва.
Гьазурайди — Куругъли Ферзалиев
