Къариблухра кlвал-югъ кутунвай лайихлу, бажарагълу ва чешнелу лезгияр халкьдиз раижун патал абурукай малуматар жагъурунин суракьда хьунин нетижайри чун гьар сеферда гьейранарзава.
И сеферда газет кlелзавайбур чна духтурвиле кlвалахзавай ва вичихъ гьакI художникдин алакьунарни авай Глафира Шагьмудиновна САФАРАЛИЕВАДИХЪ галаз танишарзава.
Ам Ростовский областдин Таганрог шегьерда 1984-йисуз дидедиз хьана. Адан диде-буба Хив райондин Цлахърин хуьряй я. Гъвечlи чlавалай адан рикlе духтур хьунин мурад авай, маса пешедай кlвалахун ада гьич фикирдизни гъизвачир. 2008-йисуз Глафиради Дагъустандин медицинадин академия куьтягьна. 2009-йисалай ада Таганрог шегьерда тади куьмек гудай азарханада (БСМП) операцияр ийидай духтур-гинеколог ва УЗИ-дин диагностикадин рекьяй пешекар (эксперт) яз кlвалахзава.
Анжах рикl гваз кlвалахдив эгечlзавай духтурдиз халисан духтур лугьуз жеда. Намуслудаказ кlвалахзавайвиляй коллективдин арада ада гьуьрмет къазанмишнава. Хирургиядин рекьяй кlвалахай цlуд йисан девирда гзаф кьадар инсанар кьиникьикай къутармишна.
“Гьалтзавай гзаф четинвилеризни килиг тавуна, кlвалахди еке лезетни гузва, виликди фидай ашкъини артухарзава”, — лугьузва духтурди.
Кьетlендаказ къейд ийиз кlанзава, Г.Сафаралиева 2016-йисуз шегьердин “Лап хъсан духтур” конкурсдин гъалибчи хьана.
Глафирадин рикl суьретар чlугунални ала. Художниквилин рекьяй вичихъ кьетlен бажарагъ авай ам мукьвал-мукьвал суьретар чlугунални машгъул я.
Ада яратмишнавай са кьадар суьретрихъ галаз Интернетдай таниш жедай мумкинвал ава. Хайи ерийривай яргъа аватlани, ада вич лезги ва Дагъустандай хьунал дамахзава. Вичин яратмишунра ада асул гьисабдай гъвечlи Ватандин гуьрчег акунар, тlебиат ва дагъви дишегьлийрин къаматар къалурзава. И кардини ам ватанперес инсан тирдан гьакъиндай шагьидвалзава.
Гьазурайди — Куругъли Ферзалиев
